Terena hanao alim-pandihizana ireo ben’ny tanana

09/11/2012

Niakatra tao an-tampon-tananan’i Toamasina mihintsy ireo solon-tenan’ny ben’ny tanana rehetra avy any amin’ny distrikan’i Mahanoro sy ireo solon-tenan’ny mpandraharaha any amin’izany distrika izany, naneho ny fitarainan’izy ireo manoloana ny ramatahora mahazo azy ireo. Nambaran’ireo olom-boafidy ireto fa teren’ny lehiben’ny distrika any an-toerana hikarakara alim-pandihizana avokoa ny ben’ny tanana manerana ny distrika iadidiany. Mandoha vola eny amin’ny distrika anefa ireo izay manaiky hanao izany. Mahazo fandrahonana kosa izay mandà.

Velon-taraina ireo ben’ny tanana miisa 11 ao anatin’ny Distrikan’i Mahanoro sy ireo mpandraharaha any an-toerana manoloana izay nambaran’izy ireo fa fanamparam-pahefana ataon’ny lehiben’ny distrika any amin’ity tanana ity. Nandritra ny valan-dresaka ho an’ny mpanao gazety izay nataon’izy ireo tao Toamasina, omaly, no nanambaran’izy ireo fa manery azy ireo hikarakara alim-pandihizana any amin’ny Kaomina tantanan’izy ireo avy ny lehiben’ny distrika. Tsy maintsi mandoha vola mitentina 200 000 ariary eny an’ivon’ny distrika anefa ireo izay miroso amin’ny fikarakarana izany alim-pandihizana izany, araka ny nambaran’ireo ben’ny tanana ihany.
Nambaran’ireo ben’ny Tanana sy mpiasam-bahoaka tafaresaka tamin’ny mpanao gazety tany Toamasina ireto ihany koa fa efa nanamboatra fahazahoan-dalana fanaovana io alim-padihizana io miisa 11, ary efa vita sonia ity lehiben’ny distrika ity, ary eo amin'ny toeran’ny daty hanaovana ny alim-pandihizana sisa no fenoin’ireo ben’ny Tanana. “Zarainy isikan’ny biraon’ny kaominina ity fahazoan-dalana fanaovana alim-pandihizana ity ary avy hatrany dia alainy ihany koa ilay saray 200.000 ariary; ireo ben’ny Tanana izay tsy manaiky dia voarahona ary miafara amin’ny famoronana antotan-taratasy mba ilazana fa tsy miasa ary tsy miraharha fitondrana ihany koa”, hoy ireo ben'ny tanana nitantara ny zavatra iainany.
Ankoatr’ireo ben’ny tanana dia velon-taraina ihany koa ny mpandraharaha sasantsasany toy ny mpitatitra sy ny mpivarotra solika any an-toerana izay nilaza fa araraotin’ity lehiben’ny distrika ity amin’ny asan’izy ireo araka ny fitarainany.
Miantso ny fandraisan’andraikitry ny fitondram-panjakana manoloana izany fihetsiky ny lehiben’ny distrika any amin’izy ireo arak’izany ny ben’ny tanana any amin’ny distrikan’i Mahanoro.