Voasambotra ilay mpanakan-dàlana

09/11/2012

Loharanom-baovao avy amina olon-tsotra no nahafantaran’ny mpitandro filaminana avy ao Sakaraha ny fisian’ireo entana mampiahiahy tao amin’ny tranon’ny olona iray tao amin’ny fokontany Andabomionga. Rehefa natao ny fisavana izany trano izany sy ny fanadihadiana ilay tompon-trano dia fantatra fa entana azony tamin’ny fanafihana fiarakodia mandalo amin’iny lalam-pirenena faha 7 iny no nangoniny tao amin’izany trano izany. Ankoatra an’ity olona izay efa voasambotry ny mpitandro filaminana avy ao amin’ny Zandarmariam-pirenena ao Sakaraha ity dia efa karohina ihany koa amin’izao fotoana izao ireo mpiray tsikombakomba taminy.

Tamin’ny fihandohan’ity herinandro ity no voasambotry ny mpitandro filaminana avy ao amin’ny Zandarmariam-pirenena i Tsivery, mponina ao amin’ny fokontany Andabomionga ao amin’ny kaomina Mahaboboka, distrikan’i Sakaraha, izay isan’ireo mpanafika fiarakodia tamin’ny lalam-pirenena faha-7. Niaiky ny helony ity mpandroba ity, araka ny nambaran’ny komandin’ny zandary any Sakaraha, ny adjudant chef Randrianantenaina Regis, ary nanondro ihany koa ireo mpiara-manafika aminy izay mbola karohina fatratra amin’izao fotoana izao. Arakan y fanazavan’ity mpitandro filaminana ity ihany dia fampitam-baovao avy amina olon-tsotra no nazoan’ny mpitandro filaminana ny vaovao mikasika ity olona voasambotra ity. Io loharanom-baovao io no nampahafantatra ny zandary ny fisian’ny trano irey izay mampiahiahy ny fokonolona tao an-tanana satria misy entana lafo vidy maro dia maro tao anatiny. Rehafa tonga teny amin’izany toerana izany ny iraky ny zandary ary nanao fisavana ny trano dia ireto avy ny santionany tamin’ireo entana tratra tao : bisikleta iray, solo-saiina iray, fitaovana fandraisam-peo iray, ary fitaovana maro isan-karazany ihany koa. Marihana fa toerana ambanivihitra no misy ity trano ity. Rehefa natao ny fanadihadiana tamin’ny tompon’ilay trano dia niaiky ny tenany fa entana norobaina tamin’ireo fiara notafihan’izy ireo tamin’iny lalam-pirenena faha 7 iny ireo nangoniny tao amin’ity trano ity ireo, ankoatr’ireo efa namidiny sy ireo anjaran’ireo namana mpiara-manafika aminy. Fantatra nandritra ny fanadihadiana ihany koa fa eo amin’ny « radier » eo Mahaboboka no fanakanan’izy ireo ny fiara lasibatra. Voalaza fa izy ireo no nanafika ilay fiara “sprinter”mpitatitra olona avy any Toliara hihazo an’Antananarivo tamin’ny 9 septembre lasa teo. Ankoatra an’ireo entana ireo dia nisy vola ihany koa lasan’izy ireo nandritra ireo fanafihana fiara ireo.
Marihana fa nanondro ireo namany miisa dimy izay mpiara-manafika aminy ity mpandroba ity saingy mbola tsy misy hita ireto olona ireto hatramin’izao. Nisy kosa olona iray izay notondroiny ho mpividy ireo entana voaroban’izy ireo. Nosamborina ity farany ity saingy navotsotry ny mpitandro filaminana mandram-piandry ny fitsarana azy.
Mponina ao amin’ny Sakaraha, ao amin’ny fokontanin’I Andafy Tanala i Tsivery. Hatolotra ny fitsarana any Toliara ny raharaha momba azy reheva tomombana avokoa ny fanadihadiana ataon’ny zandary ao Sakaraha azy.