Nidinan’ny Amnesty International ny minisitry ny Serasera

10/11/2012

Nandritra ny fihaonana teo amin’ny tompon’andraikitra iray avy ao amin’ny fandaharan’asan’ny Amnesty International aty Afrika sy ny minisitry ny Serasera no nanambaran’ny vahiny ny ahiahin’izy ireo manoloana ny zava-misy eto Madagasikara mahakasika ny raharaha vono olona any Atsimo sy ny fanagiazana ny fanaovan-gazety sy ny serasera. Nitondra fanazavana tamin’ireo teboka mahakasika ny andraikitry ny Fitondram-panjakana manoloana ireo tranga ireo kosa ny minisitry ny Serasera ary niantso ity vahiny mba hijery ifotony ny tena zava-misy any atsimo. Namafisin’ny

vahiny kosa fa tsy maintsy atao vandohan-draharaha hatrany ny fanajana ny zon’olombelona, n’inon’inona antony.Nangataka fihaonana ary noraisin’ny minisitry ny Serasera Harry Laurent Rahajason nihaona taminy tao amin’ny toeram-piasany teny Ampasanimalo, omaly ny mpikaroka avy ao amin’ny fandaharan’asan’ny Amnesty International aty Afrika, Christian MUKOSA. Niompana tamin’ny fahitan’ny vahiny ny zava-misy eto Madagasikara manodidina ny falalahan’ny asa fanaovan-gazety sy ny falalahana maneho hevitra ary ny vono olona any atsimo ny resaky ny roa tonta. Nambaran’ny fampitam-baovaon’ny ministeran’ny Serasera fa nafana tokoa ny ady hevitry teo amin’ny andaniny sy ny an-kilany nandritra izany fihaonana izany. Notsipihan’ity tompon’nandrikitra avy ao amin’ny Amnesty International aty Afrika ity manaiky ny fisian’ny fasarotana atrehan’ny fitondram-panjakana amin’ny fanatontosana ny asany amin ‘izao fotoana izao izy ireo. Nambarany kosa anefa fa na eo aza izany fahasarotana izany dia tsy azo ekena na oviana na oviana ny tsy fanajana ny zon’olombelona izay miseho amin’ny endriny maro eto Madagasikara amin’izao fotoana izao, raha tsy hilaza afa-tsy ny tsy fisian’ny falalahan’ny fanaovan-gazety sy ny vono olona any atsimo isika. Nomarihan’ny vahiny ihany koa ny amin’ny tokony hampahafantarana ny rehetra ny vaovao marina mikasika ny zava-mitranga any Atsimo: indrindra ny antony mampirongatra ny famonoan’olona any amin’ity faritra ity sy ny fandorana ny tananan’ireo mponina sivily. Notsipihin’ity manampahaizana avy ao amin’ny Amnesty international ity manokana ny momba ilay famonoan’ny vahoaka ireo olona voatondro ho dahalo tany amin’ny Faritra Anosy. Famonoan’olona izay tsy nisy fitsarana akory. Izany hoe toy ny any amin’ny firenena tsy misy làlana.
Ho an’ny minisitry ny Serasera kosa, nanambara ny tenany, araka ny fampitam-baovao avy amin’ny departemanta tarihany, fa tsy mbola nandray fanampahan-kevitra mifanohitra amin’ny falalahan’ny asa fanaovan-gazety ny ministera tantanany. Nambarany ihany koa fa mifankahalala avokoa ireo mponina any amin’ireo tanana nisehoan’ny vono olona faobe tany atsimo. Arak’izany dia izy ireo ihany no mahafantatra ireo dahalo sy tsy dahalo amin’ny tanana misy azy ireo. Nambarany ihany koa fa misy ny tsiambara-telon’ny fitandroana ny fandriam-pahalemana amin’ny raharaha tahaka ny fampandrian-tany any atsimo. Izay, arak’izany no mibaiko ny famoaham-baovao mahakasika ity raharaha ity. Nilaza moa ny minisitry ny Serasera fa tsy mitsahatra ny mamoaka vaovao ara-potoana mikasika ny fivoaran’ny raharaha any atsimo ny governemanta.