Hanao tatitra eny amin’ny Toby Ratsimandrava

13/11/2012

Eto an-drenivohitra amin’izao fotoana izao ireo manamboninahitra mitarika ny Hetsika “Tandroka” atao any amin’iny ilany atsimon’ny nosy iny. Hanao tatitra amin’ny mpanao gazety ny fizotran’ny hetsika nankinina tamin’izy ireo ireto manamboninahitra ireto androany, araka ny fampitam-baovao voaray. Tatitra izay heverina fa hifantoka betsaka amin’ny fanazavana manoloana ireo fanakianana mivaivay manandrify azy ireo nohon’ny fisian’ny faty olona maro dia maro nandritra ity hetsika ity sy ny tsy mbola nazoana an-dRemenabila hatramin’izao.

Hifamotoana amin’ny mpanao gazety eny amin’ny Toby Ratsimanrsava androany ireo mpitarika ny « Opération Tandroka » natao tany Betroka. Ny fampitam-baovao miantso ireo mpanao gazety no nahafantarana izany. Efa tazana teto an-drenivohitra hatry ny omaly ny sasantsasany amin’ireo manamboninahitra ireo. Andrasan’ny mpanara-baovao maro tokoa ity fampahafantarana ny an-tsipirihany mahakasika izany hetsika natao tany amin’iny faritra atsimo iny izany. Hetsika izay natao indrindra hamongorana ny asan-dahalo izany nahazo vahana tamin’iny faritra iny, ary natao indrindra ihany koa hisamborana an-dRemenabila, ilay dahalo isan’ny nalaza indrindra teto amin’ny firenena.
Raha araka ny fantatra hatreto dia nahatratra 20 ny dahalo maty nandritra ity hetsika Tandroka ity. Nanohitra izy ireo, araka ny fampitam-baovao ka izay no nahatonga ny famonoana azy. Voalaza ihany koa fa mahatratra 80 ny isan’ireo dahalo voasambotra ary naiditra am-ponja any Betroka sy any Tolagnaro. Ireto kosa indray dia tsy nanohitra nandritra ny fisamborana. Voalaza ihany koa fa niainga tamin’ny loharanom-baovao marom-pototra avokoa ny fisamborana sy ny fanafihana natao. Tsy voaresaka kosa ny mikasika ny fandorana tananan’olona sy ny famonoana ny mponina sivily izay isan’ny niampangan’ny tatitra maro avy any an-toerana an’ity hetsika “Tandroka” ity. Etsy an-danin’izany dia tsy mbola fantatra ihany koa ny tatitra marina momba ny tsy nasamborana an-dRemenabila hatramin’izao. Na izany na tsy izany, araka ny vaovao avy any Betroka dia mety hitarina volana iray indray ny asan’ireo mpitandro filaminana ao amin’ity hetsika manokana “Tandroka” ity. Mangataka ny hanoloana ireo mpitandro filaminana anefa ny any an-toerana satria araka ny fahitan’izy ireo dia efa reraka ary mila mpisolo izy ireo. Andrasana amin’ity androany ity moa ny tena fanazavana mivantana avy amin’ireo mpitarika ny operation “Tandroka”.