Nitondra fanazavana ireo mpitarika ny hetsika

14/11/2012

Tsy marina ny filazana fa nanao vono moka ny mponina tany atsimo ny mpitandro filaminana tamin’ilay operation Tandroka, araka ny fanazavan’ireo manamboninahitra nitarika izany hetsika izany izay niantso mpanao gazety omaly. Tsy marina ihany koa hoy izy ny filazana fa nandoro tanana izy ireo. Nangataka ny hitondran’izay nahita izany loharanom-baovao izany porofo ity manamboninahitra ity. Fantatra ihany koa, araka ny nambaran’izy ireo fa ny tetik’asan’ny Filoha teo aloha Ravalomanana momba ny fanorenena valabe no nampirongatra ny halatr’omby tany atsimo.

Mahatratra 27 ireo dahalo matin’ny mpitandro filaminana nandritra ny hetsika “Tandroka” natao tany amin’iny ilany atsimon’ny Nosy iny raha araka ny tatitra nataon’ireo manamboninahitra izay namory mpanao gazety tao amin’ny Toby Ratsimandrava omaly. Miisa 27 kosa ny fitaovam-piadiana azo tamin’ireo dahalo ireo, ary dahalo 69 no voasambotra ka nampidirina am-ponja. Mbola ny tatitra natan’ity manamboninahitra ity ihany koa no nahafantarana fa mahatratra 109 ireo olona matin’ny fokonolona tamin’ny raharaha halatr’omby tany amin’iny faritra iny. Namafisin’izy ireo fa tao anaty fifandonana avokoa no nahafatesana ireo dahalo ireo. Izany hoe tsy namono olona tsy manat-tsiny ny mpitandro filaminana, araka ny tatitra nataon’izy ireo.
Ankoatr’izay dia nilaza ihany koa ireto mpitandro filaminana ireto fa tsy nandoro tananan’olona izany izy ireo hatramin’izay nanatanterahana an’ity hetsika tandroka ity. Nanafatra mazava tsara moa izy ireo fa tokony hitondra porofo amin’izay izay milaza fa manam-baovao momba ireo tranga ireo.
Ankoatr’izay dia nanambaran’ny mpitandro filaminana ihany koa fa avy amin’ny tetik’asan’ny filoham-pirenena teo aloha momba ny valabe no nampirongatra ny halatr’omby tany amin’iny faritra iny. Nambaran’izy ireo fa nokasaina haondrana amina firenena iray any ivelany ireo omby an-drivony raha tanteraka ity valabe ity. Mbola nitaky ny hanatanteraha an’io fanamby io, hoy izy ireo, ilay firenena nanafatra izany omby andrivony izany ka io no mampirongatra ny halatr’omby.
Raha fintinina ny nambaran’ireo manamboninahitra izay nanao valandresaka ho an’ny mpanao gazety omaly dia tsy tompon’nantoka na tamin’ny vono olona na tamin’ny fandrobana fananan’olona na tamin’ny firongatry ny asan-dahalo tany Atsimo ny mpitandro filaminana. Madio mangatsakatsaka izy ireo, araka izany rehetra izany.
Na izany na tsy izany mahagaga ihany raha toa ka tsy vitan’izy ireo ny iraka nampanaovina azy dia ny fisamborana an-dRemenabila. Misy tamin’izy ireo ny nilaza fa efa naratra mihitsy ity dahalo raindahany ity ary efa sahirana izy mandeha ka tsy ho ela intsony dia ho azo. Dia tena mampametram-panontaniana arak’izany ny tena fahamarinan’ny voalazan’ny mpitandro filaminana satria olona efa maratra sy tsy afa-mandeha ara-dàlana ve dia mbola tsy voasambotr’ireo izay heverina fa sangany amin’ny raharaha tahaka itony ireo? Arak’izany na dia madio mangatsakatsaka aza izy ireo tamin’ny fanazavana izay nentiny tetsy ambony dia sarotra ny hino azy noho ity iraka nampanaovina azy izay tsy vitany araka ny tokony ho izy ity. Marihana fa mety mbola hitarina ity operation tandroka ity.