Mangala-bady ireo vehivavy gasy miasa any Arabia

17/11/2012

Nandritra ny fihaonana teo amin’ny Lehiben’ny faritra Boeny, Rasoloniaina Jean Christoph sy ny mpiandraiki-draharaha sady mpanolontsaina ao amin’ny masoivoho Malagasy any Arabie Saoudite, Audoux Septime Fierenana no nanambaran’ity farany fa araka ny fanadihadiana nataon’izy ireo dia saika avy amin’ny fangalaran’ireo vehivavy Malagasy miasa any amin’ireo fianankaviana any amin’ity firenena ity ny vadin’ny mpampiasa azy no mahatonga ny fahatezeran’ny tompobady amin’izy ireo.

Araka ny fanazavan’ity mpanolontsain’ny masoivoho Malagasy ity ihany dia tsy avy amin’ny mpampiasa matetika ny mahatonga ny fifanolanana eo amin’ny andaniny sy ny an-kilany fa avy amin’ity fangalaram-bady ity. Ankoatr’izay dia nambaran’ity tompon’andrikitra ity ihany koa fa maro amin’ireo vehivavy malagasy miasa any Arabie Saoudite no tsy manana ireo fahaizana faran’izay kely ilaina amin’ny asa an-trano izay ampanaovina azy. Ohatra : misy amin’izy ireo ny tsy mahay mandrehatra Gaz akory ary mbola tsy nanao izany hatrizay niainany. Misy amin’izy ireo ihany koa ny tsy mahay na dia miarahaba amin’ny teny anglisy aza.
Na izany na tsy izany, nanamafy i Audoux Septime Fierenana fa afaka manararaotra tsar any fisian’ny asa any amin’ity firenena ity ny tovovavy Malagasy, indrindra manoloana izao krizy sy tsy fisian’asa eto an-tanindrazana izao. Nambarany fa mikarakara ny fandraisana azy ireo sy ny fahafahany mivezivezy an-tanindrazana ny masoivoho Malagasy any an-toerana. Isan’ny imasoan’ny masoivoho ihany koa araka ny fanazavany ny fanaraha-maso ny fampiharan’ireo fianankaviana mampiasa Malagasy ny fifanarahana sy ny fanajana ny zon’olombelona.
Marihana fa ivon’ny resaka nandritra ny fihaonana teo amin’ny Lehiben’ny faritra Boeny sy ity mpanolon-tsain’ny masoivoho Malagasy any Arabie Saoudite ity ny hananganana atsy hoa atsy any Mahajanga ny ivo-toerana iray mpandefa mpiasa malagasy any amin’ity firenena ity. Nisy tera-tany Saoudiana niara-dàlana taminy nandritra izao fihaonana izao. Marihina fa mahatratra 500 ireo mpiasa vehivavy Malagasy efa lasa niasa any amin’ireo firenena Arabo toa an’I Arabie Saoudite sy Koweit. Ny “Global service recruitement d’Antananarivo” no nandefa azy ireo amin’ireo firenena ireo. Fantatra ihany koa fa maminavina ny handefa mpiasa any Allemagne sy Australie ary Dulaï ity birao mpandefa olona any ivelany ity.