Hametraka fitoriana ny namany

17/11/2012

Tsy voaaja ny zon’olombelona nandritra ny fisamborana sy ny fampidirana am-ponja an’i Riry Be sy ny namany raha araka ny nambaran’ireo mpikambana ao amin’ny hetsika “Tsisy miala aketo niany”, izay nitafa tamina mpanao gazety tany Toamasina, omaly. Nambaran’izy ireo fa marary nohon’ny daroka nahazo azy nandritra ny fisamborana azy ity mpanao fihetsiketsehana ity ary tsy vitan’izany fa tako-kenatra kely monja no teny an-kodiny tamin’ny fotoana nitondran’ireo mpisambotra azy. Mihevitra ny hametraka fitoriana amin’ny tsy fanajana ny zon’olombelona noho izany ireo mpikatroka amin’ny fikambanana “Tsisy miala eto niany”.

Tsy hipetra-potsiny manoloana ny fihazonana am-ponja sy ny fomba nisamborana ny mpitarka azy ireo, araka ny loharanom-baovao ireo lohandihany ao amin’ny fikambanana “Tsisy miala aketo niany” any Toamasina. Nandritra ny firesahana tamina mpanao gazety tany an-toerana no nanambaran’izy ireo ny fahitany ny fomba nisamborana sy ny manjo an’i Riry Be amin’izao fotoana izao. Voalazan’izy ireo fa tsy mety misakafo ity farany raha tsy ny fiannkaviany no manatitra hanina ho azy mivantana. Etsy an-danin’izany anefa dia arahi-maso akaiky sady tsy azo vangian’ny havany ihany koa I Riry Be. Nomarihan’ireo mpikambana ao amin’ny biraon’ny “Tsisy miala aketo niany” ihany koa fa marary sy mitaraina i Riry be nohon’ny tananany izay nofolahina nandritra ny fisamborana azy. Mivonto be ihany koa izany tanany izany ary marary ny vatany manontolo nohon’ny daroka nahazo azy. Ankoatr’izay,nambaran’izy ireo ihany koa fa “caleçon sy silipo ary akanjo maivana no teny an-kodiny tamin’ny fotoana nisamborana azy sy nanipiazana azy tao anatina fiara 4x4. Voalaza ihany koa fa notapenana lamba ny masony mba tsy ahitany ny toerana nitondrana azy.

Manoloana izany rehetra izany dia nilaza ny hitory amin’ny « tsy fanajana ny zon-olombelona, fidirana an-keriny an-tranon’olona ataona mpiasam-panjakana, fanafihana mitam-piadiana arahana halatra, ary fakana an-keriny olona », ireo mpikambana ao amin’ny biraon’ny hetsika “Tsisy miala aketo niany”. Ny mpisolo vava azy ireo no voalaza fa hikarakara izany. Ankoatr’izay dia miady ho azy ireo ihany koa ny vondron’ny fiaramonim-pirenena ao Toamasina, izay efa nihaona tamin’ny FFKM sy ireo parlemantera avy amin’ny Faritra Antsinanana nanaiky nandray azy ireo. Mihevitra ny hangataka fihaonana amin’ny biraon’ny Sadc eto Madagasikara ihany koa izy ireo. Isany takian’izy ireto ny famotsorana ireo olona 05 nogadraina ao Toamasina, famotsorana ny tangalamena Zakariasy ary ny famerenana ny filohan’ny antenimieran’ny varotra amin’ny toerany izay isan’ny tapaka teo anivon’ny “forum” nataon’izy ireo tao Toamasina ny volana oktobra teo.