Leo ny fitondrana Rajoelina ny Fiangonana Katolika

19/11/2012

Nampihetsi-po ary nampametram-panontaniana ny maro ny tari-bavaka nataon’ny Arsevekan’Antananarivo, nandritra Sorona Masina nanamarihana ny fetin’i Mgr Razanakolona teny Andohalo. Nampifandraisin’ny Arseveka tamin’ny votoatin’ny hafatry ny Fivondronamben’ny Eveka izay nivory ny 7 ka hatramin’ny 17 novambra teo ny hafatra nofonosin’izany tari-bavaka nataony izany, izay miantso ny kristianina tsy an-kanavaka, « manomboka amin’ny Eveka », mba hibebaka sy hanova fijery, manoloana ny zava-misy amin’izao fotoana izao eto amin’ny firenena. « Na izaho eveka aza dia mila mibebaka ary manova fijery amin’ny raharaham-piaraha-monina », hoy ny voalaza nandritra ny Sorona Masina manokana izay natrehan’ireo Pretra maro ao anatin’ny Diosezin’Antananarivo ary notaterina tao amin’ny fahitalavitra TVM, omaly alahady

Tsiahivina fa manana ny anjara-andraikiny teo amin’ny fivoaran’ny zava-misy eto amin’ny firenena, indrindra hatramin’izay nidiran’i Madagasikara ao anatin’izao krizy izao ny Fiangonana Katolika, indrindra tamin’ny alalan’ny Arsevekan’Antananarivo izay misolotena ny Fiangonana ao an’ivon’ny FFKM. Samy nanana ny heviny mahakasina ny fihetsik’izany mpitondra fivavahana izany manoloana ny raharaham-pirenena, arak’izany, ny isan’isany avy. Nisy mihintsy aza ireo izay nilaza fa isan’ireo nanamora ny fihatongavan’ireo mpitondra amin’izao fotoana izao, teo amin’ny fitondrana ny fihetsiky ny Arseveka. Tetsy an-daniny, nanamafy izay fiheveran’ny maro izay ihany koa ny fahitana azy teny amin’ireo lanonana samihafa nokarakarain’ny fitondrana Tetezamita, kanefa tsy tazana tamin’ireny ireo mpitondra fivavahana hafa teo an’ivon’ny FFKM. Ary vao tsy ela akory izay dia nanaitra ny mpanara-baovao ihany koa ny nandrenesana ny Arsevekan’Antananarivo izay nanambara nandritra ny fotoam-pivavahana teo Mahamasina ny fialàn-tsiny avy amin’ny fitondrana tetezamita nohon’ny tsy fahatongavan’ny filoha Rajoelina tao amin’izany Sorona Masina lehibe izany.
Amin’izao falatsahan’ny firenena ao anatin’ny fasahiranana tsy roa aman-tany izao, sy manoloana ny fanambaran’ny Fivondronamben’ny Eveka izay nitanisa ny fahavoazana tsy roa aman-tany mahazo ny vahoaka Malagasy amin’izao fotoana izao dia tsy vitsy ireo mahita fa manomboka manova ny fomba fijeriny ary manenina tokoa ny Fiangonana, ary isan’izany mazava loatra ny Arsevekan’Antananarivo. Ireto avy moa ireo zava-misy eto amin’ny firenena amin’izao fotoana izao izay nokianin’ny Fivondronamben’ny Eveka :
• « Ahodinkodina ny loharanon-karem-pirenena ka potika amin’ny alalan’ny fifanarahana tsy ara-drariny : bois de rose, vy, vatosoa, solitany, omby… ary ny ampahany amin’ny tanintsika.
• Manjaka ny mpanao ratsy : risoriso, kolikoly, dorotanety, vaki-trano, famonoana olona, fanalanjaza, fanaparitahana fitaovam-piadiana etsy sy eroa. … ary misy mpitandro filaminana mampiasa ny fahefana ananany hamotehana vahoaka.
• Noho ny tsy fahasahiantsika miaro ny tombon-tsoam-pirenena dia firenen-kafa no manery ankolaka na mivantana mba tsy handraisantsika vahaolana eto an-toerana.
• Efa nolazainay teto fa ny politika eto amintsika dia mivaona amin’ny fanompoana ny vahoaka : maro loatra ireo antoko politika, rafitra tsy mitombina, fitadiavam-bola sy fitadiavan-tseza no ampanjakaina.
• Tsy takona afenina ny fahasahiranana eo amin’ny fiainana ara-piaraha-monina : mafy ny hanoanana, tsy afa-mianatra ny ankamaroan’ny zana-bahoaka, ary izay tafita tsy mahita asa, any amin’ny toeram-pitsaboana tsy ampy fanafody na anjakan’ny kolikoly loatra, maro ny tokantrano rava, ary tsy voajery mihitsy ny tombo-tsoan’ireo tantsaha maro an’isa.
• Ny fitsarana tsy azo itokisana, fa toa ny manan-katao sy ny misy mpanohana ary ny mahalala olona hatrany no mahazo rariny eo amin’ny tribonaly, ary firifiry ireo tsy manan-tsiny no mibaby ny heloky ny hafa, na dia ireo mpitsara te hijoro amin’ny marina zary voahilika. Ny fanjakan’ny tsy maty manota no tena fototry ny tsy fisian’ny fitoniana.
Arak’izany, efa tena lasa lavitra ny fahalovana eto amintsika satria ny konsiansy mihitsy no maty na novonoina. Tsy ny fahaizana intsony na ny herim-po no heverina ho antoky ny fahombiazana fa ny kiantranoan-trano, ny hafetsena ary ny fanararaotana ara-nofo, ka voahitsakitsaka ny fanajana ny aina sy ny fanantenana hitraka”.