Sefo fokontany maty nodorana asidra

22/11/2012

Mitaky ny hanokafana fanadihadiana sy hitondrana eny amin’ny Fitsarana ilay raharaha mahakasina ny nahafatesan’ny filohan’ny fokontany Ankeniheny ireo filoham-pokontany miisa 138 ao amin’ny distrikan’i Toamasina I. manahy ny fisian’ny fanodikodinana ity raharaha ity sy ny fanafenana ny marina momba izany izy ireo ary efa nandefa ny fitarainany teo anatrehan’ny distrika mpiahy azy ireo. Arak’izany dia nilaza ny hanao fametram-pialàna faobe izy ireo raha toa ka tsy misy tohiny ny fitakiana nataony.

Mampaka-peo amin’izao fotoana izao ireo sefo fokontany any amin’ny distrikan’i Toamasina Voalohany. Araka ny nambaran’izy ireo dia mampiahiahy ny fomba fitantanana ny fanadihadiana mahakasika ny raharaha nahafatesan’ny filoham-pokontany tao amin’ny Cité Nouvelle Ville any an-toerana. Raha tsiahivina dia maty vokatry ny asidra nafafy taminy ity filoham-pokontany ity. Ny Alatsinainy teo izy no maty rehefa notsaboina nandritra ny herinandro teny amin’ny hôpitaly Be tany toamasina vokatr’izay asidra izay. Araka ny loharanom-baovao avy any an-toerana dia dia tao amin’ny “hotel Ivondro” Canada no nandrarahan’olo-tsy fantatra asidra tamin’ity sefo fokontany ity izay nitondra azy tany amin’ny fahafatesana.
Tsara ny mampatsiahy fa nampifandraisan’ireo sefo fokontany namany tamina raharaha izay ifanolanan’ity sefo fokontany ity tamina mpandraharaha teratany Karana iray any an-toerana ity raharaha ity. Nambaran’izy ireo fa nanao izay afany hahazoana ny tany iray tao amin’ny fokontany Coté Nouvelle izay niadidian’ilay sefo fokontany voalaza tetsy aloha izany mpandraharaha Karana izany. Tsy nanaiky an’izany hatramin’ny farany anefa ilay sefo fokontany ary tsy nanaiky ihany koa ny tolotra nomen’ilay vahiny, na dia efa naka tohana avy amina tompon’andraikitra ambonimbony kokoa tany an-toerana ilay Karana. Heverin’ireo sefo fokontany ao amin’ny distrikan’i Toamasina I ho misy ifandraisana amin’izay zava-niseho izay arak’izany ity raharaha fandorana tamin’ny asidra ny naman’izy ireo ity. Ny loharanom-baovao ihany koa no nanamarika fa nisy vavolombelona izay nahita ny zava-nitranga tamin’ny nahavoazan’ilay sefo fokontany. Raha ny fandehan’ny fanadihadiana izay ataon’ny mpitandro filaminana hatramin’izao anefa dia manahy mafy ny amin’ny mety tsy handraisana izay fijoroana vavolombelona izay izy ireo.
Marihihana fa efa nanao fitarainana teny an’ivon’ny distrika momba ity raharaha ity ireo sefo fokontany miisa 138 any Toamasina I. Ny hitondrana ity raharaha ity eny an’ivon’ny fitsarana mahefa no fangatahan’izy ireo. Hatreto anefa dia mbola tsy tanteraka ihany izany. Eo anatrehan’izany rehetra izany dia nilaza ny handray fepetra izy ireo. Tsy inona ny fepetra ho raisiny fa ny fametram-pialana miaraka raha toa ka tsy mandeha amin’ny laoniny ny fanadihadiana mikasika ity raharaha ity.
Efa tsy andraisana karama fa fanompoam-pirenena ny asanay kanefa dia mbola hamoizana ny aina toy izao noho hetraketraky ny mpanam-bola sy ny forongony ary ireo mpiray tendro aminy ihany. Aleo miala dieny mbola tsy maro izahay no ho faty eto”, hoy ny nambaran’ny iray tamin’ireo sefo fokontany ireo