Vonona ny handrodana ny « mandan’i Jerikao » ny Mpitondra Fivavahana

22/11/2012

Nanambara mazava ny fahavononany hitarika ny vahoaka handrodana ny tsy mety eto amin’ny firenena amin’izao fotoana izao ireo mpitondra fivavahana mivondrona ao amin’ny HMF (hetsiky ny mpitondra Fivavahana). Miantso ny vahoaka tsy ho tamana amin-dratsy na ho zatra ampiharana ny tsy rariny izy ireo nandritra ny valan-dresaka ho an’ny mpanao gazety izay nataony omaly. Tafiditra amin’izany indrindra ny fotoam-bavaka lehibe izay iantsoan’izy ireo ny vahoaka tsy an-kanavaka amin’ny asabotsy izao eny amin’ny kianjan’Antsahamanitra.

Manao politika izahay saingy tsy mitady toerana. Isan’ny nambaran’ireo mpitondra fivavahana avy ao amin’ny HMF izany nandritra ny tafa nifanaovany tamin’ny mpanao gazety teny amin’ny restaurant Bon accueille teny Ambatonakanga, omaly. Mazava loatra fa ny raharaham-pirenena amin’izao fotoana izao sy ny ho fandraisan’andraikitr’izy ireo manoloana izany no votoatin’izany tafa ho an’ny mpanao gazety izany. Nambaran’ny Pastora Roger Randriamisata, iray amin’ireo lohandohany ao amin’ity HMF ity fa ny mpitondra Fivavahana no tena manda farany eto amin’ny firenena rehefa, tsy hita iantehenara fa difotry ny fanaovana politika manohana antoko ireo mpitandro filaminana izay antenaina amin’izany. Arak’izany dia vonona ny hitarika ny vahoaka “handrodana ny mandan’i Jerikao” izahay, araka ny fanambarana nataon’ireto mpitondra fivavahana ireto. Nasongadin’izy ireo ihany koa fa mitaona ny vahoaka Malagasy haneho firaisan-kina marina tokoa ka tsy “ho tamana amin-dratsy” na ho zatra ampiharana ny tsy rariny ka miforitra anaty tsy sahy mijoro amin’ny tena maha-izy azy ny tena, mandray an-tanana ny ho aviny sy ny kolontsainy ary ny fiandrianany. Miantso ny vahoaka hijoro amin’ny heriny rehetra amin’ny fahamarinana manoloana izay rehetra hita fa tsy rariny ary tsy ho mpiray tsikombakomba amin’ny mpamono olona ka hankasitraka izany ihany koa ny hetsiky ny mpitondra fivavahana tamin’ity fanambarana nataony omaly ity.
Etsy an-danin’izany nanao antso avo amin’ny fahitan’izy ireo ny zava-misy eto amin’ny firenena ihany koa izy ireo. “Aoka izay ny fanakalozana ny ain’olona sy ny rà nalatsaka natakalo seza sy harena, ary aza totofana amin’ny basy sy ny fampitahorana ny marina fa tsy hataon’Andriamanitra tsy manan-tsiny tsy akory izay manao izany ”, hoy ny voasoratra tao amin’ny fanambarana izay nataon’izy ireo.
Taorian’ireo Eveka avy amin’ny fiangonana Katolika eto Madagasikara, dia azo lazaina fa ity indray izany izao no fanambarana azo kilasiana ho isan’ny lehibe indrindra amin’ny tsy fankatoavana izao fitondrana ny raharaham-pirenena eto amintsika izao sy ny fanairana ny vahoaka manontolo mba hikaro-bahaolana haingana. Na izany na tsy izany mampametram-panontaniana ny maro ihany koa ny momba ny antony tsy hifanantonan’ireto mpitondra fivavahana ireto manoloana izao zava-misy eto amin’ny firenena izao. Raha araka ny tokony ho izy dia tokony hifanantona izy ireo ary hifanome tanana mba ho fanavotana ny firenena amin’izao kizo misy azy izao.