Nanomboka omaly ny « vitrine économique »

23/11/2012

Nosantarina omaly ary tsy hifarana raha tsy amin’ny faran’ny herinandro izao ilay hetsika ara-toe-karena fantatra amin’ny anarana hoe « vitrine économique» any Toamasina. Ny Praiminisitra Omer Beriziky no nitarika ny delegasiona avy amin’ny fitondram-panjakana izay nanome voninahitra ny fanokafana tamin’ny fomba ofisialy izany hetsika izany. Nambaran’ny Praiminisitra tamin’ny laha-teny nataony tamin’ny lanonam-panokafana fa tsy maintsy mametraka ny tany tan-dàlana i Madagasikara raha te-hametraka fitoniana marina eto amin’ny firenena. Ny fitoniana, hoy izy, no miantoka ny tena fampandrosoana amin’ny lafiny rehetra. Nomarihan’ny Praiminisitra ihany koa fa ao anatin’ny fahantrana tanteraka ny 75% n’ny mponina ao Toamasina, araka ny tatitra faran’ny banky iraisam-pirenena. “Raha samy manara-dalana amin’ny sehatra tsy miankina sy ny fanjakana dia samy mahazo tombony amin’ny asany avy ka ho tratrantsika ny fenitra napetraka toy ny fampiroboroboana ny sehatra tsy miankina antoky ny fandrosoan’ny ekonomiantsika”.

Isan’ny niara-dàlana tamin’ny Praiminisitra tamin’ny fotam-panokafana ny « vitrine économique » tany Toamasina ihany koa ny Praiminisitra lefitra Botozaza. Ity farany kosa dia nanambara mazava fa “potiky ny krizy politika novolena teto ny ekonomia Malagasy. Ny fitoniana ara-politika no vahaolana amin’ny fampiroboroboana indray ny toe-karem-pirenena, satria ny fandrosoana ara-ekonomika no miteraka ny fandrosoana ara-tsosialy amin’ny alalan’ny famoron’asa sy amin’ny alalan’ny fisian’ny famantsiam-bola samy hafa”.

Raha ny zava-misy mandritra ny 03 andro ny hetsika, dia isany nahazo vahana ireo sehatra tsy miankina avy amin’ny faritra maro manerana ny nosy, nefa tsy diso anjara ihany koa ireo sehatra tsy miankina tao Toamasina. Ny tetikasa Ambatovy izay isany mpanohana manokana ny hetsika, dia nampiranty ireo asa rehetra ataony manomboka amin’ny fanodinana ny nikela sy kobalta, hatramin’ny asa sosialy ara-piompiana sy ara-pambolena ary fanampiana samy hafa fanaony amin’ireo sampan-draharaha misy ao aminy. Isany nampafantatra ny asany koa ny SPAT amin’ny “vina 2015 – 2030” napetrany entina hanatsarana sy hanitarana ny ambaindain’ny seranan-tsambo hanaraka ny fenitra iraisam-pirenena; nisy raha teo omaly tolakandro ny fanazavany mikasika ity “vina” goavana napetrany ity. Nampahafantatra ny asa ara-pambolena fanaony koa ny orinasa SILAC izay isany mpanohana ny hetsika ara-toe-karena ao Toamasina ity; toy izany koa ny Air Madagascar izay nanome tolotra mihintsy mandritra ny hetsika ao Toamasina ho an’ireo mpanjifany; ary ny orin’asa Fanalamanga avy ao Moramanga amin’ny vokatry ny ala ataony.

Trano eva 50 no hita ao amin’ity hetsika ara-toekarena ity. Orin’asa vaventy maro avy amin’ny faritra samihafa manerana ny nosy sy avy amin’ny faritra manodidina an’i Toamasina no mandray anjara amin’izany.