« Fanjakana mafia no misy eto »

24/11/2012

Valin-kafatra ho an’ireo mpitandro filaminana izay nanao fanambarana mahakasika ny fizotran’ny hetsika manokana « Tandroka » any Betroka no azo hamaritana ny valan-dresaka ho an’ny mpanao gazety izay nataon’i Raharimalala Louisette, omaly tao amin’ny hotely Colbert. Arak’izany dia nitondra ny fijeriny manoloana ny fanambaran’ireo manamboninahitra mikasika ity raharaha ity ny tenany. Nisy ihany koa ny fijoroana vavolombelona mikasika ny habibiana nataon’ny mpitandro filaminana tany amin’izany faritra izany ka nilazan’izy ireo fa « fanjakana mafia no misy eto »

« Gadrainareo ny olona milaza ny fahamarinana sy manohintohina ny tombontsoanareo : Tangalamena mijoro, gadraina, tsy mbola nisy teto amin’ny firenena izany, aiza ny tena fahamarinana ? ». Io no fehezanteny nentin’ity solombavambahoaka teo aloha tany Bekily, Raharimalala Louisette, nanomboka ny fanambarany, omaly tao amin’ny Hotely Colbert. Nambaran’ity mpanao politika ity fa mitovy laharana amin’ny Andriana, ny Lonaka, ny Hazomanga, ary ny Olobe ny Tangalamena. Arak’izany dia olona natao hamaha olana sy hanome soso-kevitra mahasoa, natao hitarainana ary hiaro ny harem-pirenena ireo sokajin’olona ireo, kanefa dia hiaran’ny fanagadrana avy amin’izao fitondrana izao.
Ankoatr’izay dia isan’ny nametrahan’i Raharimalala Louisette fanontaniana ihany koa ny mikasika ny raharaha Remenabila. Voasambotra ve i Remenabila sa tsia ? Nahomby ve ny « opération Tandroka » sa tsia ? Ireo no fanontaniana mavaivay napetrak’ity mpanao politika ity tamin’ny fanazavana izay nataony. Namafisiny anefa fa tsy ny fisamborana ny dahalo no kianiny fa ny fandorana ny tananan’ireo tsy manan-tsiny sy ny fampiasan-kery na fitaovana maherivaika amin’izy ireo.
Mbola isan’ny nitondran’i Raharimalala Louisette fanazavana ihany koa ny fanakianana azy mikasika ny fanofana trano fandraisam-bahiny mandritra ny fampitam-baovao ataony. Nambarany fa nohon’ny tsy fahafahany maneho hevitra amin’ireo haino amanjerim-panjakana nohon’ny sivana maherivaika misy ao dia tsy maintsy nisafidy ny haneho hevitra amin’ireny trano fandrisam-bahiny ireny ny tenany. Mahatratra 240 000 ariary araka ny nambarany ny vola lany amin’izany, raha manao izany maimaim-poana any amin’ny haino amanjerim-panjakana ny hafa.
Marihina fa nandritra ity fanehoan-kevitra ity dia nisy mponina avy any amin’iny distrikan’i Bekily izay nijoro vavolombelona momba ny habibiana manjo ny vahoaka any amin’izany faritra izany. Tsimangiky no anaran’ilay nijoro vavolombelona, ary ao amin’ny kaomina Maroviro any amin’ny Distrikan’i Bekily izy no monina. Nambarany fa tamin’ny 8 oktobra 2012 tokoky ho tamin’ny 5 ora sy sasany maraina dia tonga tao amin’ny fokontany Ankilimary ao amin’ny kaomina Anakafy ireo mpitandro filaminana avy amin’ny operation Tandroka. Novorian’izy ireo avokoa ny vatan-dehilahy tao amin’izany tanana izany, manomnoka amin’ny 15 taona no miakatra. Taorian’ny famoriana azy ireo dia nentin’ireo mpitandro filaminana tany avokoa ny omby 300 mahery tao an-tanana sy ireo vatan-dehilahy. Tsy voaporofo anefa ny maha dahalo na tsia an’ireto olona ireto. Fantatra ihany koa fa tsy nisy tafaverina tany amin’ny tompona ireo omby ireo na iray aza. Ireo olona nosamborina kosa: ny sasany niharan’ny herisetran’ny mpitandro filaminana; ny sasany kosa naiditra am-ponja, eny fa na dia ireo mpanati-bary aza dia noharan’izany.
Marihina fa antso avo manandrify ny mpitondra amin’izao tetezamita izao no isan’ny namaranana ity valandresaka nataon’i Raharimalala Louisette ity. Nambarany fa mibaribary ny tsy fahamarinan’ity fitondrana ity.