Voarohirohy tamin’ny kidnapping ny taona 2005 ?

26/11/2012

Nanjaka teto an-drenivohitra ny fakàna an-keriny teratany karana ny taona 2005. Nandrenesana ity asa ratsy ity hatrany isaka ny herinandro. Pika, Djaffar, Lama, Syeve, Mahandry ary Ndimby, ireo no anaran’ireo jiolahy fanta-daza tamin’izany fotoana ary nandripaka ireo teratany karana mpanefoefo teto toa ny talen’ny orinasa Caromad sy ny maro tsy voatanisa. Ankehitriny, mafana ny raharaha Remenabila sy ny asan-dahalo any Atsimo ary anisan’ny nitondra fanankianana mahery vaika tamin’ny fihetsika sy ny fomba amam-panaon’ny miaramila nanatanteraka ny “opération” Tandroka sy ny raharaham-pirenena amin’ny ankapobeny, Raharimalala Louisette.

Mihazakazaka izay tsy izy anefa ny toe-draharaha taorian’izany fanambarana nataony momba ny mpitondra amin’izao fotoana izany. Mitamberina ao anatin’ny ady hevitry ny mpitondra fanjakana ny zava-nitranga tany amin’ny taona 2005 tany. Resabe tamin’izany tokoa mantsy ny nanofan’ireo jiolahy mpanao kidnapping voalaza anarana tetsy ambony, ny tranon’i Louisette Raharimalala teny amin’iny Faritra Atsimondrano iny. Misy milaza mihitsy aza fa noho izany raharaha naha “voarohirohy” azy izany no antony nialany teto Madagasikara ka tsy niverenany an-tanindrazana raha tsy efa niala teo amin’ny fitondrana ny filoha teo aloha Marc Ravalomanana. Voalaza tamin’izany andro izany kosa fa nisandoka anarana sy karapanondro ireo jiolahy tamin’ny fotoana nanofan’izy ireo ny trano. Tsy nisy tafapetraka teto mihitsy moa ireo rehetra voarohirohy tamin’ireny kidnapping ny taona 2005 ireny; ohatra amin’izany ny mpiambina ny filoha teo aloha, Jean Marc Koumba, izay nampangaina no mpamatsy basy sy fitaovana an-dry Steve sy Mahandry.
Lasa misy fifandraisany ho azy tampoka teo araka izany ny raharaha Remenabila sy ny asan-dahalo any Atsimo ary ny tontolon’ny kidnapping tany amin’ny taona 2005, izay naha voatonontonona ny anaran’i Louisette Raharimalala, tompon’ny trano nieren’ireo andian-jiolahy gagilahy teto an-drenivohitra.