« Hamerina an-dRavalomanana Marc », ny Amnesty International

26/11/2012

« Izahay no niangavy tamin’ny mpitondra fanjakana nandefa ireny miaramila nanao ny “opéeration” Tandroka ireny. Tsy maintsy mpitandro filaminana avy aty « ivelany » no nalefa nanao iny hetsika iny noho ny kolikoly avo lenta eo amin’ny dahalo sy ny mpitandro filaminana ary ny manampahefana any amin’iny Faritra misy anay iny. Tsara toerana hiresaka momba ny raharaha any Atsimo ny tenako amin’ny maha avy amin’ny foko Bara ny tenako. Manameloka marindrano ny fanambarana nataon’ny Amnesty International aho. Tsy misy « génocide » izany tany Atsimo; porofon’izany tsy misaona ny tenako satria tsy misy havako maty nandritra ny “opération” Tandroka. Ireo dahalo nanohitra tamin’ny fampiasana fitaovam-piadiana mahery vaika no lavon’ny mpitandro filaminana ; izay tsy nanohitra kosa nosamborina velona », hoy ny ministry ny Rano, Reboza Julien nandritra ny tafa nataony tamin’ny mpanao gazety.

Niteraka resabe tokoa ny fanambarana nataon’ny Amnesty International manodidina ny « opération » Tandroka, indrindra ny filazan’ity fikambanana iraisam-pirenena mpiahy ny zon’olombelona ity ny famonoana zaza tsy ampy taona sy kilemaina ary ny fandorana tanàna iray manolontolo nataon’ny mpitandro filaminana ka niantsoany fanadihadiana iraisam-pirenena sy ny hanolorana eo anatrehan’ny Fitsarana ireo manamboninahitra nitarika izany hetsika izany. Nanao tohy vakana ny fanehoan-kevitra avy amin’ireo tomponandraikitra ambony toa ny ministry ny Foloalindahy, ny jeneraly Rakotoarimasy Lucien ary farany teo ny ministry ny Rano, Reboza Julien. Toa mifanohitra ihany anefa ny fanambarana re mikasika ity asan-dahalo tany Atsimo ity. Nolazaina tany am-boalohany fa vokatry ny fanondranana omby velona mankany ivelany no antom-pisian-dRemenabila. Voaporofo izao fa ny ministry ny Foloalindahy, ny jeneraly Rakotoarimasy Lucien, no anisan’ireo ministra nanao sonia ilay didim-panjakana nanafoana ny fanondranana omby ary voalaza mazava tsara tao anatin’izany didim-panjakana izany fa omby 50.000 no nokasaina haondrana tamin’izany didim-panjakana navoakan’ny fitondrana Tetezamita izany. Nolavin’ny ministry ny Rano anefa io petra-kevitra novohizin’ny mpitondra fanjakana io, araka izao manaraka izao: “tsy resaka fanondranana omby mankany ivelany ny raharaha Remenabila fa asa fanakorontanana avo lenta. Kalachnikov mbola vaovao no ampiasan’ireo dahalon-dRemenabila; ny an’ny Tafika anefa kalachnikov efa roapolo taona. Efa renareo mpanao gazety angamba fa olona ambony sy manamboninahitra no mpamatsy fiadiana azy ireo”.
Ambadika politika
Nitondra ny fomba fijeriny mikasika iny fanambarana nataon’ny Amnesty International iny ny ministra Reboza ka nanambarany fa ny filatsahan-kofidian’ny filoha Andry Rajoelina mihitsy no tanjona ao ambadik’izao zavatra ataon’ny Amnesty izao. Hoy indrindra izy: “tsy maintsy mametra-pialana roa volana alohan’ny fifidianana ny filoha Rajoelina; izany hoe ny praiminisitra Omer Beriziky, ny filohan’ny CST ny jeneraly Dolin Rasolosoa ary ny filohan’ny CT, Mamy Rakotoarivelo no hitondra ny tany sy ny fanjakana. Dia hambara aorian’izany fa tena nisy “génocide” tokoa tany Atsimo mba ahafahana mamerina an-dRavalomanana Marc eo amin’ny fitondrana sy hisakanana ny filatsahan-kofidian’ny filoha Rajoelina. Koa heveriko fa tsy mendrika tokoa izao fihetsiky ny Amnesty International izao, manely vaovao tsy marina mampikorontana saim-bahoaka. Vonona hiantoka izay rehetra te hanamarina ny zava-misy any Atsimo ny tenako, hisorohana izao fiampangana tsy marim-pototra nataon’ny Amnesty International izao”.
Vaky tanteraka araka izany ny ady eo amin’ny mpitondra Tetezamita sy ny Amnesty International manodidina ity raharaha any Atsimo ity izay lasa fitaovana hifamotehana ara-politika ankehitriny. Na izany aza dia tokony hisy fanadihadiana avo lenta hisokatra ihany momba ireo mpitandro filaminana, olom-boafidy ary manampahefana voalazan’ny ministry ny Rano, Reboza Julien, fa mpiray tsikombakomba amin’ireo dahalo amin’ny fanaovana kolikoly any amin’iny Faritra Anosy iny. Mitodika any amin’ny Amnesty International ihany koa ny mason’ny mpanara-baovao. Tokony haneho porofo mazava tsara ny amin’ny fahamarinan’ny fanambarana izay nataony izy ireo. Tsy fantatra intsony mantsy izay manana ny marina; misalasala vokatr’izany rehetra izany ny vahoaka ary mety tsy hanana fikotisana intsony amin’ity fikambanana mpiahy ny zon’olombelona maneran-tany ity.