« Tsy voatery ho tazonina ny datim-pifidianana »

27/11/2012

Nameraka ny ahiahiny ny amin’ny mety tsy ahatanterahan’ny fifidianana izay kasaina hatao eto amin’ny firenena amin’ny taona ho avy ny mpitondra tenin’ny Filoha teo aloha. Nambarany mazava fa tsy ho tanteraka araka ny tokony ho izy, ary tsy hanan-danja ny fifidianana raha tsy tafaverina an-tanindrazana ny filoha teo aloha Ravalomanana Marc. Nambarany ihany koa fa miankina amin’ny fifanarahana politika eto amintsika no ahafahan’ny filoha teo aloha mody an-tanindrazana.

Ho tanteraka sa tsia ny fifidianana izay kasaina hatao eto Madagasikara amin’ny taona ho avy? Fanontaniana apetraky ny rehetra izany manoloana ny zava-misy eto amin’ny firenena amin’izao fotoana izao. Raha ho an’ny fitondrana tetezamita manokana dia tsy misy isalasalana ny tsy maintsy ahatanterahan’ny fifidianana amin’ny taona ho avy. Tsy izany kosa ny fahitan’ny mpanohitra. Araka ny nambaran’ny mpitondra tenin’ny filoha teo aloha izay nanamarika fa² tsy mbola azo antoka hatramin’izao ny hisian’ny fifidianana amin’io taona ho avy io. Lafin-javatra vitsivitsy no nanaporofoany izany. Voalohany amin’ireny ny fanakanana ny filoha teo aloha tsy hiverina an-tanindrazana izay midika avy hatrany fa tsy mbola mipetraka ny fitoniana eto amin’ny firenena. Ny fitoniana anefa no antoka voalohany sady lehibe indrindra tsy hisian’ny fanakianana ny fifidianana ka hidiran’ny firenena indray amin’ny krizy vaovao, araka ny fanazavana avy amin’i Guy Rivo Randianarisoa mpitondra tenin’ny Filoha Marc Ravalomanana. Nambarany ihany koa fa tsy fifidianana mifanaraka amin’ny fandaharam-potoana ara-dàlana no hatao eto amin’ny firenena fa fifidianana nateraky ny krizy vokatry ny fanonganam-panjakana nataon’ny mpiotondra amin’izao fotoana izao. Mazava arak’izany fa tsy misy afa-tsy ny fahafahan’ny rehetra milatsaka amin’izany fifidianana izany no ahafahana mandamika araka ny tokony ho izy ny fiainam-pirenena.
Eo anatrehan’izany mbola tsy fisian’ny fitoniana eto amin’ny firenena izany dia nilaza ny mpitondra tenin’ny Filoha teo aloha fa tsy voatery ho tazonina ny datim-pifidianana izay efa nofaritan’ny CENIT miaraka amin’ny solontenan’ny fianankavimbe iraisam-pirenena. Nambarany fa ny fifanarahanaa politika no tokony hamaritra mazava tsara ny fahafahan’ny firenena miroso amin’izay fifidianana izay.
Marihana fa nitondra fanazavana mikasika ny fanampahan-kevitry ny fitsarana any Afrika Atsimo nohon’ny fitorian’ny AV7 ny filoha teo aloha ihany koa ny mpitondra teny Guy Rivo Randrianarisoa. Fanampahan-kevitra izay mandidy ny filoha teo aloha tsy hahazo miala an’i Afrika atsimo ary ny fihazonana ny taratasy ahafahany manao izany. Nambaran’ny mpitondra tenin’ny filoha teo aloha fa miankina ny amin’ny fifanarahana politika izany. Hatreto hoy izy, dia tsy azo iadian-kevitra ny fiverenana an-tanindrazan’ny filoha teo aloha Marc Ravalomanana, nohon’ny fisian’ny tondrozotra izay mamaritra izany. Nambarany ihany koa fa eo am-pelan-tanan’ny filoha teo aloha soamantsara ny “passeport”ny ary afaka mivezivezy malalaka ao Anfrika Atsimo ity farany ity.