Manohitra ny saran-dalàna 400 ariary

28/11/2012

Ny filohan’ny VOndron’Olona Miaro ny Zon’ny Mpanjifa, Rasolofosaonina Ratsimbazafy Eugène dia nanindry fa ny zavatra tapaka tamin’ny fihaonana teo amin’ny mpiandraikitra ny UCTU sy ny filohan’ny tetezamita Andry Rajoelina, dia manisy fanavakavahana eo amin’ny samy mpanjifa, nefa olona samy sahirana izao ihany. Fantatra manko tamin’izany fihaonana izany fa 300 ariary ny saran-dàlana hoan ‘ny mpianatra, ny zokiolona ary ny mpiasan’ny orinasa afakaba. Izany anefa dia tsy vaha-olana, hoan’ity filohan’ny VOMZM ity.

“I Andry Rajoelina tompoko dia tsy mandeha taxi-be ka tsy mahalala tsara any tena mianjady amin’ny mpanjifa rehefa mandoa ny saran-dàlana 400 ariary izy ireo. Tsy tokony hasiana fanavakavahana eo amin’ny samy mpanjifa fa tokony hitovy avokoa ny fepetra hampiarina. Noho izany, toherinay hatramin’ny farany izany fanapaha-kevitra izany ary tsy ekenay ny saran-dàlana 400 ariary fa sahirana ny mpanjifa”. Marihina fa notsindrian’ity farany fa ny zavatra ataon’ny UCTU dia mamono ny vahoaka fa tsy hanasoa azy velively. Hisy, noho izany, fangatahana fihaonana amin’ny filoha Andry Rajoelina mba hitadiavana izay mety ho vahaolana. Nametraka izany fangatahana fihaonana izany moa ireto farany androany ka handefa solon-tena 5 avy amin’ny vondrona ary mpanjifa eo amin’ny 15 eo ho eo, araka ny resaka nifanaovana tanim’ity filohan’ny VOMZM ity.
Raha toa ka tsy tanteraka izany fihaonana amin’ny filohan’ny tetazamita dia hanao hetsika ny VOMZM, hanairana ny mpitondra fanjakana amin’ny fijalian’ny vahoaka noho ny tsy fahaiza-mintatana ataon’ireto farany ireto. “Hametraka [banderole] isaky ny [arrêt] milaza ny tsy fanekenay mpanjifa ny saran-dàlana 400 ariary no hetsika voalohany. Efa gorgora ny fanjakana amin’ny fitondrana vaha-olana hoan’ny firenena ary ny ataon’ny UCTU etsy an-daniny dia momono ny vahoaka fa tsy manasoa azy akory”. Ny antony hanaovan’ireto farany hetsika mafy dia mafy toy izao moa, dia noho ny halafon’ny vidim-piainana ka tsy ahafahan’ny mpanjifa mandoa izany saran-dalana 400 ariary izany. “Mety manontany tena angamba ianareo hoe maninona izahay mpiaro ny zon’ny mpanjifa no tsy dia ahita-teny firy raha tsy amin’ny resaka saran-dalana toy izao. Ny antony dia tsotra, ao amin’io no mifehy ny fiakaran’ny vidim-piainana amin’ny lafiny rehetra. Ny vary, ny menaka ary ny maro hafa ihany koa, ka noho izany, raha tsy misy ny fihaonana amin’i Andry Rajoelina dia hanohy ny tolona izay natombokay izahay”. Ireto farany moa dia mistipaka tanteraka ny fanapahan-kevitry ny filohan’ny tetezamita ny hampiditra fiara (hafarana avy any Chine) eto amintsika satria ireo dia hoan’ny fitanterana an-drenivohitra ihany aloha no tafiditra ao anatin’ny tetikasan’ny filohan’ny tetezamita izay nataony niaraka tamin’ny mpitatitra avy ao amin’ny UCTU.