Miaramila am-perin’asa tratra nanendaka

30/11/2012

Voasambotra nohon’ny velam-pandrika nataon’ny mpitandro filaminana avy ao amin’ny FOP (Force d’Intervention de la Police) tany Toamasina ireo mpanendaka ny mpandalo tratra hariva tany amin’ny làlana mandalo ny bazary Valpinson Toamasina. Telolahy izy ireo no voasambotra ka miaramila amperin’asa ny iray. Antsy sy fitaovana misy herin’aratra no entin’izy ireo mandrahona ireo olona lasibatry ny fanendahana ataony. Ela nanaovan-dratsy ka tratra ihany. Maro amin’ireo mponina tsotra na mpiasa na koa mpitari-posy tratra hariva ka voatery mandalo amin’ny faritra manodidina ny Valpinson Toamasina ireo nitaraina nohon’ny fisian’ny olon-dratsy izay manendaka eo amin’izany faritra izany.

Mampiasa antsy fohy sy “Garden Angel TW-10” (fitaovana misy herin’aratra mahatratra 300V ), ireo jiolahy handrahonany ireo olona sendra azy. “Mahatratra dimy isa-maraina ny fitarainana tonga eto amin’ny FIP nohon’ny afitsoka ireo jiolahy mpanendaka ireo”, hoy ny nambaran’ny Officier Rafaliarivo Jules, komandan’ny FIP Toamasina. Ny alin’ny alarobia dia mpiasa alim-podiana no lasibatra izy ireo, ka lasa tamin’izany ny vola sy ny firavaka ary ny finday teny aminy.

Teo anatrehan’izany dia nanao velam-pandrika nahafahana nisambotra azy ireo ny mpitandro filaminana avy ao amin’ny FIP tamin’ny alalan’ny fandefasana polisy manao fanamiana sivily nihaodihaody teny amin’ny manodidiana. Tratra ambodiomby vokatr’izany, teo am-panendahana an’ireto polisy roa nampitafiana akanjon’olon-tsotra izy telo lahy mpanendaka izay tsy iza fa I Solofonirina 29 taona, Alexandre 20 taona ary Armand 32 taona. Mbola tratra teny amin’izy ireo ihany koa ireo koa ireo fitaovana fampiasany sy entiny mandrahona ary mampitahotra ireo olona tratrany. “Tsy mandefitra amin’ny tsy famelana ny vahoaka hiaina milamina ny FIP. Fanalambaraka anay rahateo ny fihetsik’izy ireo satria tsy misy 100m miala ny biraonay ny fanaovan’izy ireo ny asa ratsiny”, hoy hatrany ny Officier Rafaliarivo Jules; “ny hany fangatahanay dia ny fanohizana ny fiaraha-miasa matotra eo aminay sy ny fitsarana, ka hiazonana ireto jiolahy tratra ambodiomby ireo am-ponja vonjy maika, mba hilaminan’ny vahoaka”, hoy ihany ny lehiben’ny FIP any an-toerana. Marihina fa miaramila am-perin’asa ao amin’ny RM3 Toamasina ny iray tamin’izy telolahy voasambotra ireto.