Nanamafy ny fisian’ny fandorana tanana

01/12/2012

Mitatitra ireo fijoroana vavolombelona mahakasika ny habibiana nataon’ireo miaramila nanao ilay hetsikamanokana “Tandroka” tany amin’ny faritra atsimo ny profesora Elimbiraza Mandridake, mpampianatra ao amin’ny onivesiten’i Toliary. Namafisin’ity tompon’andraikitra ity tamin’ny alalan’izany fanambarana izany fa tena nisy tokoa ny fanapotehana fananan’olona sy fandorana tanana tao anatin’izany hetsika manokana izany. Manao antso avo mba hampitsaharana izany habibiana izany ny profesora Elimbiraza Mandridake.

Tranga maromaro no nentin’ity mpampianatra sady tera-tany avy any atsimo ity naneho ny fisian’ny fihoaram-pefy nataon’ireo mpitandro filaminana nandritra ny hetsika “Tandroka” tany atsimo. Isan’izany ny nitranga tao amin’ny Fokontany Morafeno, Miary Omby, Ambalabe, ary Asely ao amin’ny kaomina ambanivohitra Mahabo ny 18 sy ny 21 oktobra 2012. Nodorana ireo tanana ireo sy ny vokatry ny mponina ary ny fananany. Nisy tranga toy izany ihany koa tao amin’ny Fokontany Manombo sy Morarano, tao amin’ny kaomina ambanivohitra Analamary ny 16 octobre. Notondroina ho mpiray tsikombakomba tamin-dRemenabila ireo vatan-dehilahy tao amin’ireo tanana ireo. Vokany : nodarohana sy nopotehina ny fananan’izy ireo. Isan’ny niharan’ny habibian’ireo mpitandro filaminana ihany koa ny tao amin’ny Fokontany Voromiantsa, kaomina Ivahona tamin’ny faran’ny volana septembra . Nopotehin’ny mpitandro filaminana ny tanana, araka ny tatitra nataon’ny ben’ny tanana tany an-toerana ny 6 oktobra lasa teo. Potoka niaraka tamin’izany ihany koa ny bokin’ombin’ny mponina taimin’izany tanana izany. Lasibatra ihany koa ny tao amin’ny Fokontany Ankilimary, kaomina ambanivohitra Ianakafy, tamin’ny fahatongavan’ireo miaramila ny 8 oktobra 2012. Noteren’ireto farany hanome azy ireo ny fananana lafo vidy rehetra tany amin’izy ireo ny fokonolona. Omby miisa 307 no nentin’ireo mpitandro filaminana niverina tany Betroka taorian’io fidinana tao amin’io tanana io, ary tsy tafaverina tamin’ny tompony ireo omby ireo raha tsy nanome vola be ny mpitandro filaminana izy ireo. Nisy tamin’ireo omby ireo anefa no maty novonoin’ny mpitandro filaminana.
Nambaran’i Profesora Elimbiraza tamin’ny fanambarana nataony ihany koa fa nampiasa hery tsy ara-drariny ireo mpitandro filaminana araka ny fijoroana vavolombelona nataon’ny mponina tany amin’izany faritra izany. Misy hoy izy ny tatitra nataon’ireo mponina, ary efa natolotra ireo manampahefana teny anivon’ny distrika any an-toerana izany fitarainana izany.
Niantso ny vahoaka tsy an-kanavaka hijoro sy hanampy an’ireo havana any atsimo vokatr’ity zava-manjo azy ireo ity profesora ity, ary niantso ihany koa ireo mponina any atsimo mba tsy hatahotra ny hijoro vavolombelona amin’ireo zava-nitranga marina tany amin’iny faritra iny