Ampiasaina amin’ny fitaterana Letchis ny fiaran’ny Tafika Malagasy

03/12/2012

Voaporofo indray zao fa manao izay danin’ny kibony tokoa ny manamboninahitry ny tafika amin’izao fotoana izao eo amin’ny fampiasana ny fitaovam-panjakana. Voaporofo ihany koa fa gaboraraka tanteraka ny fampiasana ireo fitaovana natao hanompoana ny firenena araka ny maha izy azy ny Tafika.

Ny zava-nitranga, ary hitan’ny be sy ny maro tao amin’ny fokontanin'Ihotsika ao amin'ny kaominina Mahavelona Foulpointe nandritra ny fiotazana ny letchis tamin’izany faritra izany no antony ilazana an’ireo rehetra ireo. Fiaran’ny Tafika no hitan’ny rehetra fa nampiasana vadina manambininahitra tamin’ny fitaterana izany vokatra izany. Amin’ny maha-fiaram-panjakana ara-tafika ity fiara be ity, dia heverina ihany koa fa volam-bahoaka no nandohavana ny solika laniny nandritra an’io asa io. Mazava loatra fa tsy nahafaly ireo mpanangom-bokatra sasany ny fahitana izany tranga izany, indrindra ny fandrenesana fa sahy nividy lafo an’ireo vokatra tany an-toerana ilay vadina manamboninahitra nitondra ity fiara ity. Izany hoe nanimba ny tsean’ny mpanangom-bokatra maro. “Tena tsy rariny intsony izao ataon’ny tafika Malagasy izao, efa tsy vitany mampiasa ny fiaram-panjakana amin’ny fananararaotam-pahefana, fa sahy manimbazimba anay matihanina amin’ity fanangonam-bokatra ity mihitsy no mampiditra fatiantoka ho anay satria izy ireo tsy misy vola miala aminy, fa tombony avokoa ny azy”, hoy ny fimenomenonan’ireo mpanangom-bokatra izay tezitra tamin’izao zava-nitranga tao amin’ny fokontany iray tao Mahavelona Foulpointe izao. Marihina fa raha 10.000 ariary ny iray kesika (20kilao eo ho eo), nividianan'ny mpanangom-bokatra rehetra ny letchis, dia nahavita nampiakatra izany hatrany amin’ny 12.000 ariary ka hatramin’ny13.000 ariary ilay ramatoa vadina manamboninahitra nitondra ity fiaran’ny tafika Malagasy ity.
Ny loharanom-baovao avy ao amin’ny lehiben’ny tafika misahana ny faritan’i Toamasina (RM3), ny Jly Rasamoelina, no nilaza fa tsy avy ao Toamasina ilay fiaran’ny Tafika fa avy aty Antananarivo. Miandry ny fanazavana avy amin’ny etamazaoro ny tafika Malagasy indray izany mikasika ity fiaram-panjakana nampiasan’ny vadina manamboninahitra noho ny fanararaotam-pahefana ity.