Navanon-doza tany Toliara

03/12/2012

Nitrangana lozam-pifamoivoizana nahafatesana olona efatra ny lapihazo natsangana teo afovoan’arabe ny andro mialoha ary nokasaina hanatanterahana ny lanonana ôfisialy fitokanana ny TVPlus tany Toliara. Olona efatra avy amina fianankaviana iray no indray namoy ny ainy vokatr’izany lozam-pifamoivoizana izany, mbola tsaboina eny amin’ny hôpitaly nohonny ratra nahazo azy kosa ny olona iray mbola isan’ny mpandeha tamin’ilay fiarakodia niharan-doza. Notokanana tao anatin’ny ranomason’ireo fianankaviana nidiram-pahoriana ny TVPlus tany Toliara.

Ny alin’ny zoma nifoha asabotsy no nitrangan’ny lozam-pifamoivoizana teo amin’ny lapihazo izay natsangana ary saika hanaovana ny lanonana ôfisialy ho fitokanana ny fanitarana ny TVPlus tany Toliara. Fiara “Express” izay nentin’ny talen’ny Sekoly teknika any an-toerana ary tao anatin’izany fiara izany ihany koa ny vady aman-janany, no nifatratra tao amin’ity lapihazo efa natsangana ity. Marihina fa teo amin’ny làlana manoloana ny trano misy ny TVPlus any an-toerana no nananganana izany lapihazo izany. Tafiditra tao ambanin’ilay lapihazo ilay fiara vokatry ny fandehanany mafy, araka ny loharanom-baovao. Vokany, olona efatra no maty tsy tra-drao ka isan’izany ny talen’ny Seloky teknika sy ny vadiny. Naratra mafy ary mbola tsaboina any amin’ny hôpitaly kosa ny iray tamin’ity fianankaviana ity.
Araka ny notaterin’ny fahitalavitra TVPlus tamin’ny fampahalalam-baovaony ny asabotsy lasa teo dia efa nisy ireo sakana rehetra sy ara-dàlana manandrify ny fametrahana lapihazo eo afovoan-dàlana toy izao teo amin’io toerana io. Nambaran’izy ireo ihany koa fa nisy mpiambina teny an-toerana ary efa nanome fampitandremana an’ilay fiara ireo mpiambina talohan’ny nitrangan’ny loza. Mbola isan’ny voalaza tao amin’ny fampahalalam-baovaon’ny TVPlus ihany koa ny hoe nandrenesana fofo-toaka tao amin’ilay fiara tamin’ny fotoana nitrangan’ny loza. Ireo rehetra ireo izay toa miteny sahady, na dia tsy mivantana aza, fa tsy nanam-pahadisoana na kely aza ny ireo izay nametraka an’ity lapihazo ity teo amin’izany lalam-bahoaka izany; ary toy ny milaza ihany koa fa diso tanteraka ireto olona niharam-pahavoazana ireto.
Tsy dia mitovy an’izany kosa anefa ny fahitan’ny ampahan’olona sasany tany amin’ity tanana ity izao zava-nitranga izao, indrindra amin’ny maha làlam-bahoaka an’ilay toerana nametrahana ny lapihazo. Ny làlana izay natao alehan’ny olona sy ny fiarakodia fa tsy natao hanaovana lanonana sy hetsika toy ireny. Toy izay fanao eto Antananarivo ihany koa amin’ny fotoanana fety aman-danonana. Arak’izany, na dia efa nilaza aza izy ireo fa efa nisy ireo fepetra rehetra manandrify ny fanapahana ny làlana dia tsy manala ny maha tompon’andraikitra azy ireo izany, manoloana ity zava-niseho ity, indrindra ny fiadidiana ny tanan’i Toliara izay nanome alàlana ny TVPlus hanapaka ny lalam-bahoaka mba hanaovan’izy ireo ity lanonam-pitokanana ity. Etsy an-danin’izany, tsy fetim-pirenena na fetim-bahoaka ity nentina nanapahana ilay làlana fa fety manokana izay tokony tsy ahakasika mivantana ny fiainambahoaka manontolo tao Toliara akory.
Tsetsatsetsa tsy aritra ny ilazana fa be dia be tokoa amin’izao fotoana izao ny fandikan-dàlana amin’ny fampiasana ireny lalam-bahoaka ireny. Raha tsy hilaza afa-tsy ny eto Antananarivo isika izay efa lasa fomba amam-panao ny mampandefitra ny mpampiasa làlana ka mampiasa ireny làlam-bahoaka ireny amin’ireny antony tsy nanaovana azy ireny, raha tsy hilaza afa-tsy ny lanonam-panjakana hanapahan-dàlana eto Antananarivo isika. Torak’izany koa ny lafin-javatra sasan-sasany toy ny tsenan’i Mahamasina izay ny alin’ny alarobia dia efa mitsangana avokoa ireo tranoeva vita amin’ny vy hivarotran’ny olona any afovoan-dàlana. Mety hampidi-doza avokoa ireny ary hitarika fahasorenena ho an’ny vahoaka tena nanaovana ny làlana.