Tandindomin-doza indray ny taom-pianarana

04/12/2012

Manahy mafy ny amin’ny mety hiverenan’ny fitokonan’ny mpampianatra mpanabe, indrindra ny Sempama ny mpanara-baovao maro amin’izao fotoana izao. Araka ny fantatra dia manomboka tsy faly indray amin’izao fotoana izao ny ankamaroan’ireo mpampianatra nohon’ny fahafantarana fa tsy tanteraka araka ny tokony ho izy hatreto ny fampanantenana nataon’ny ministeran’ny Fanabeazam-pirenena, indrindra izay voalazan’ny minisitra nandritra ny lanonam-panokafana tamin’ny fomba ôfisialy ny taom-pianarana. Iray amin’ireny ny famerenana ny karaman’ireo izay tapaka karama. « Efa mandinika ny fanampahan-kevitra ho raisinay izahay amin’izao fotoana izao”,

hoy ny fanambaran’ny Filoha Nasinalin’ny Sendikan’ny mpampianatra eto Madagasikara na ny Sempama, Raharivoatra Claude, raha nanontaniana ny fahitany ny fivoaran’ny tontolon’ny fampianarana sy ny fanabeazana amin’izao fotoana izao ny tenany. Nambarany ihany koa fa tandindomin-doza tanteraka ny tontolon’ny Fanabeazana amin’izao fotoana izao nohon’ny tsy fisian’ny fahavononan’ny ministera hitondra fanovana araka ny tokony ho izy amin’ny sehatra ity. Porofon’izany hoy ihany ity mpanabe ity ny tsy fitazonany ny teny nomeny mikasika ny famahana ny disadisa teo amin’ny ministera sy ny sendikan’ny mpampianatra. « Amin’izao isika miteny izao dia maro amin’ireo mpampianatra izay tapaka karama no mbola tsy nahazo ny karamany. Misy tamin’izy ireo ihany koa no nomena naoty niaraka tamin’ny bon de caisse izay azony tamin’ny faran’ny volana teo. Naoty izay mamidra azy hiasa amin’ny toeran-kafa », araka ny fanazavana nataon’ny filoha nasionalin’ny Sempama.
Arak’izany dia tondroin’ireo mpikambana ao amin’ny Sempama ho tsy mitana ny teny nomena ny ministry ny Fanabeazam-pirenena. Azo lazaina fa manosihosy ny naoty laharana 12-183/MIN/MEN/SP izay manafoana ny famindran-toerana miendrika famaizana, ihany koa ny minisitra, raha araka ny fanazavan’ny filohan’ny Sempama ihany.
Manomboka mampaka-peo arak’izany ny ankamaroan’ireo mpanabe, indrindra manoloana ny fihavian’ny fety ao anatin’izao faraparan’ny taona izao. Nambaran’izay ireo fa sady efa kely ny karaman’izy ireo nohon’ny tsy nanekena ny fangatahana mahakasina ny tambin-karama, no tsy mbola nomena ihany koa izany.
Tsara ny manamarika fa raha araka ny fanazavan’ny filohan’ny Sempama dia efa saika niverina amin’ny asany avokoa amin’izao fotoana izao ny mpampianatra mpanabe, saingy tsy midika faharesena akory izany. Nambarany fa araka ny fanampahan-kevitra niarahan’izy ireo dia dingana ihany izao fiverenana an-dakilasy izao mba ahafahana manazava amin’ireo mpanabe naman’izy ireo, sy ho an’ny mpianatra ary ny ray aman-drenin’ny mpianatra ny maha-zava-dehibe an’izao fitakiana ataon’izy ireo izao. Fitakiana izay mifototra amin’ny famerenana amin’ny laoniny ny hasin’ny fampianarana eto Madagasikara. Arak’izany dia tsy midika fifaranan’ny fitakiana akory izao fiverenana miasa izao. Mety hiverina hitokona arak’izany izy ireo, indrindra ihany koa nohon’ny fahitana fa tsy nahatanteraka ny fanamby napetrany ny ministera.
Tsy isalasalana arak’izany rehetra izany ny mety mbola hisian’ny fitokonana vaovao indry eo amin’ny tontolon’ny fanabeazam-pirenena eto Madagasikara. Tsiahivina fa naharitra volana maro ny fitokonana nataon’ny Sempama manerana ny nosy nandritra ny taom-pianarana lasa. Fitokonana izay nisy akony ratsy ihany koa teo amin’ny fiatrehana ireo fanadinam-panjakana.