Ho tapahan’ny minisitry ny Fitsarana ny karaman’ny mpitokona ?

06/12/2012

Mienjan-droa ny tady eo amin’ny ministeran’ny Fitsarana sy ny sendikan’ny mpiraki-draharaha eto Madagasikara nohon’ny fitokonan’ireto farany. Na dia nanambara ny mbola fahavononany amin’ny fanohizana ny fifampidinihana hikatsahana vahaolana amin’ity fitokonana ity aza ny avy ao amin’ny ministera dia nilaza ihany koa fa vonona ny handray fepetra manokana raha ilaina izany. Niantso ireo mpanao fitokonana mba tsy handrahona an’ireo izay vonona ny hiverina hiasa ihany koa ny ministeran’ny Fitsarana

Tamin’ny alalan’ny resaka nataon’ny Sekretera Jeneralin’ny Ministeran’ny Fitsarana, Andrianasolonjanahary Jean Emile no nahafantarana fa miaiky ny mbola tsy fahitana marimaritra iraisana eo amin’izy ireo sy ny mpikambana ao amin’ny sendikan’ny mpirai-draharaha eto Madagasikara izy ireo. Nilaza ny amin’ny fisian’ny ezka efa nataon’ny ministera mba hanomezana fahafaham-po an’ireo mpitokona ihany koa ny sekretera jeneraly. « Efa nanome ampahany tamin’ny fitakiana nataon’ny mpiraki-draharaha ny ministera kanefa mbola tsy nakatoavin’izy ireo izany. Na izany na tsy izany tsy mitazam-potsiny akory ny ministera fa manentana azy ireo mandrankariva mba hiverina amin’ny asany. Mangataka an’ireo mpitokona ihany koa izahay ato amin’ny ministera mba tsy hanaovan’izy ireo fandrahonana an’ireo izay vonona ny hiverina hiasa. Marihana fa efa misy amin’izy ireo ny miverina miasa, toy ny lehiben’ny mpiraki-draharaha ao amin’nyfampanoavana. Mety handray fepetra hafa anefa izahay mba hamahana an’izao olana izao », araka ny fanazavana nataon’ity tompon’andraikitra ity. Tsy vitsy moa ny nilaza fa toa hoe efa tapa-kevitra ny hanapaka ny karaman’ireo mpiraki-draharaha mitokona mihintsy ny ministeran’ny Fitsarana amin’izao fotoana izao, toy izay efa nataon’ny fanjakana tamin’ireo Paramedes sy mpampianatra Sempama izay notapahana karama.
Raha nanontaniana ny fahitany an’izay fanambaran’ny sekretera jeneralin’ny Ministeran’ny Fitsarana kosa ny sekretera jeneralin’ny sendikan’ny mpiraki-draharaha dia nanambara mazava fa tsy nandrahona n’iza n’iza izy ireo hatramin’izao. Porofon’izany, hoy izy, ny momba ny « greffier en chef » ao amin’ny fitsarana ambaratonga voalohany eto Antananarivo izay nilaza mazava teo anatrehan’ny sendikan’ny mpiraki-draharaha fa tsy hanao fitokonana. Hatramin’izao dia tsy nandray anjara tamin’ny fitokonana io tompon’andraikitra io kanefa tsy nisy nandrahona azy tamin ‘izany, araka ny fanazavana ihany. Ankoatr’izay dia nambaran’ny sekretera jeneralin’ny sendikan’ny mpiraki-draharaha fa mitohy hatrany ny fitokonan’izy ireo, ary tsy matahotra « requisition » izy ireo raha toa ka izany no fepetra tian’ny ministera ho raisina manoloana izao tsy fahitana vaha-olana izao.
Tsara ny manamarika fa samy naneho ny fahavononan’izy ireo amin’ny fanohizana ny fiaraha-midinika ny an-daniny sy ny an-kilany. Nanambara kosa anefa ny filohan’ny sendikan’ny mpiraki-draharaha fa ny fihaonana eo amin’izy ireo sy ny filohan’ny tetezamita no dingana manaraka hitan’izy ireo fa tokony hatao. Efa nisy ny fangatahana fihaonana tamin’ity farany ka mety ho amin’izao faran’ny herinandro izao no hanatanterahana izany.