Mbola tsy ankatoavin’ny Vondrona Eropeana

07/12/2012

Hita taratra tamin’ny tatitra nataon’ny lehiben’ny delegasion’ny Vondrona Eropeana eto Madagasikara, mahakasika ny fanampahan-kevitry ny Filankevitra Eropeana tamin’ny 3 desambra teo fa tsy misy irika mihintsy ny hiheverana fa hankato an’izao fitondrana tetezamita izao ny Vondrona Eropeanina. Nasngadin’ity tatitra ity fa mbola tohizan’izy ireo hatrany ny fanampahan-kevitra mahakasika ny voalaza ao amin’ny fifanarahan’ny Cotonou amin’ny fifandraisany amin’i Madagasikara; ary tsy hiova izany raha tsy tafapetraka soamatsara ny fitondrana ara-dàlana avy amin’ny fifidianana.

Mbola miahiahy fatratra amin’ny zava-misy eto Madagasikara amin’izao fotoana izao ny Vondrona Eropeanina araka ny tatitra nataony omaly. Misy ireo dingana vita ka isan’izany ny fametrahana an’ireo andrim-panjakan’ny tetezamita araka ny voalazan’ny Tondrozotra, ary ny firosoana amin’ny fanatenterahana ny fifidianana. Mbola goavana ihany koa anefa ireo lesoka indrindra mahakasika ny fampiharana an-tsakany sy an-davany ny tondrozotra. Izay raha fintinina ny fahitan’ny Vondrona Eropeana ny zava-misy eto Madagasikara amin’izao fotoana izao. Nasongadin’ny Vondrona Eropeana manokana ihany koa ny mbola tsy fisian’ny tontolo azo antoka amin’ny fampizorana araka ny tokony ho izy ny fifidianana eto amintsika, izay kasaina hatao ny 8 mai sy 3 jolay amin’ny taona ho avy.
Nanamafy ny fanohanany tsy misy fepetra ny fanelanelanana ataon’ny SADC anefa ny Vondrona Eropeana, ary nilaza mazava ny lehiben’ny delegasiona eto Madagasikara fa tsy manan-kevitra ambara mikasika ny filatsahana na tsy filatsahan’ny filohan’ny tetezamita sy ny filoha teo aloha amin’ny fifidianana izy ireo.
Na izany na tsy izany naneho ny fanohanany ny fampandehanana ny fifidianana ihany koa ny Vondrona Eropeana. Nambarany fa hanampy ara-bola ny fanaraha-maso, sy ny fanomanana ny fifidianana amin’ny lafiny rehetra ny Vondrona Eropeana. Mitentina 15 tapitrisa Euro ny vola anampian’ny Vondrona Eropeanina ny fikarakarana ny fifidianana eto amintsika. Nanamafy ihany koa ny fanambarana fa vonona ny hanampy avy hatrany an’i Madagasikara ny Vondrona Eropeana raha vantany vao azo antoka ary eken’ny be sy ny maro ny fifidianana. Raha atao amin’ny teny hafa dia miankina amin’ny fahavitan’ny fifidianana ara-dàlana no hiverenan’ny fiaraha-miasa sy ny fanampiana ara-bola an’i Madagasikara.
Etsy an-danin’izany rehetra izany, mitohy hatrany ny famatsiambola mahakasika ny mahaolona avy amin’ity sehatra ity eto Madagasikara. Mahatratra 160 tapitrisa Euro ny vola atokany hanampiana an’ity lafiny eti eto amintsika amin’ny taona ho avy. Voakasik’ity fanampiana ity ny lafiny sosialy, ny fanabeazana ary ny fahasalamana.