Azo henjehina ny ministeran’ny Asa Vaventy

07/12/2012

Nandriaka tahaka ireny zava-nitranga tamin’ny 7 febroary 2009 ireny ny rà teny Ankadindramamy omaly. Olona 13 no indray namoy ny ainy; 21 hafa kosa naratra mafy ankoatra ny fahasimban-javatra mitentina an-tapitrisany maro. Razana hotohoto sy potipotika no sisa novantanina taorian’ilay lozam-piarakodia. Tapaka “frein” ilay kamiao Mercedes nitondra vary, nidina tamin’iny fidinambe mampitohy an’i Mahazo sy Ankadindramamy iny. Avy hatrany dia nivantana tany amin’ireo mpiantsena, toeram-pivarotana nanamorona ny arabe, nialohan’ny nivadihany teo afovoan’ny arabe. Mazava ho azy fa tomponandraikitra amin’izao loza nahafatesana olona maro be izao ny tompon’ilay kamiao sy ny mpamily; tsy afa-miala ihany koa nefa ny ministeran’ny Asa Vaventy sy ny CUA. Marihina fa tsy vao iny omaly iny akory no nitranga loza mahatsiravina tahaka izao teo amin’io toerana io kanefa tsy nisy fandraisana andraikitry ny Fanjakana.

Efa nigadra
Andraikitry ny ministeran’ny Asa Vaventy ny mametaka takela-by (panneau de signalisation) mametra ny lanjan’ny fiara mifamezivezy amin’ny lalana iray, indrindra fidinambe tahaka iny lalana nahafatesana olona maro be omaly iny. Tsy misy izany anefa eo amin’io sampanana midina mihazo an’Ankadindramamy io. Azo henjehina tsara mihitsy araka izany ny Fanjakana avy amin’ny alalan’ny ministeran’ny Asa Vaventy satria tsy nahavita na tsy mahafantatra akory ny andraikiny ka niteraka loza ho an’ny fiaraha-monina. Toa tsy mahagaga ihany anefa izany satria olona efa nigadra teny Antanimora ny taona 2008 no mbola notendrana ho Sekretera Jeneralin’ity ministera ity. Lany olomanga mihitsy angamba ny firenena satria dia olona tany am-ponja ny ankamaroan’ireo olom-boatendry mameno ministera ary ireo Andrim-panjakana (CT sy CST) eto amintsika.
Tsy vita mora ny raharaha tahaka izao raha tany amin’ireo firenena efa mandroso no nitrangan’izany; efa nametra-pialàna teo no ho eo mihitsy ny minisitra. Voaporofo tanteraka ary tsy azo hiadian-kevitra mantsy ny tsy fandraisana andraikitry ny ministera tamin’iny loza mahatsiravina namoizana olona am-polony omaly iny. Ny eto amintsika indray olona efa manan-draharaha eny amin’ny Fitsarana ary efa notànana am-ponja vonjy maika mbola mitàna ny andraikitra maha S.G ihany.