400 tapitrisa ariary isaky ny niaram-boina no tokony alohan’ny “Assurance”

08/12/2012

Mbola resabe teto amintsika hatramin’izao ny mikasika ilay lozam-pifamoivoizana nahafatesana olona 14 sy nandratrana olona 20 mahery tetsy Ankadindramamy ny Alakamisy lasa teo. Isan’ny andehanan’ny sain’ny maro amin’izany ny mikasika ny andraikitry ny isan’isany avy manoloana iny zava-nitranga iny sy ny fanonerana tokony ho azon’ny fianankavian’ny niharam-boina nohon’ny fahavoazana niditra taminy. Momba ity farany ity dia mahatratra hatramin’ny 400 tapitrisa ariary isaky ny fianankaviana niharam-boina no tokony alohan’ny trano fiantohana, raha araka ny nambaran’ny mpahay làlana iray nanontaniana.

Tsy azo lavina ny filazana fa tsy hiverina ny maty na dia homena vola mandifitra ny lohany aza ireo fianankavian’ny niharam-boina. Na izany na tsy izany, amin’ny raharaha tahaka itony dia tsy maintsy alehan’ny eritreritra hatrany ny fampiharana ny làlana mikasika ny fanonerana tokony ho azon’ireo izay voakasik’iny loza iny mivantana, indrindra ireo fianankavian’ny maty sy naratra. Mipetraka ary ny fanontaniana ny amin’ny mety ho andraikitry ny trano fiantohana sy ny andraikitr’izay voaporofo fa nanam-pahadisoana ka nahatonga an’iny loza iny.
Mpahay làlana iray izay namatrehana izany fanontaniana izany no nanamarika fa “tsy rariny raha avela maimaim-poana amin’izao iny zava-nitranga iny”. Mahazatra amin’ny tranga toy itony dia fieritreretana fa anjaran’ny Trano fiantohana (Assurance) ny manonitra ny fahavoazana, toy ny ratra, ny fahafatesana na koa ny fahapotehan’ny fitaovana, araka ny fanazavan’ity mpahay làlana ity ihany. Marihina fa arakaraky ny karazam-piantohana izay miantoka an’ilay fiara nahavanonan-doza ny momba izay fandoavana ny fanonerana ny fahavoazana izay. Na izany na tsy izany, tsy isalasalana ny milaza fa hanao izay ho afany mba tsy handohavana vola na tsy handohavana afa-tsy izay faran’ny kely indrindra amin’izany ny Assurance, raha araka ny fanamarihan’ity mpahay làlana ity ihany. Iaraha-mahalala ihany koa, hoy ihany ity manampahaizana ity fa tsy vitsy amin’izao fotoana izao ireo izay tsy manana afa-tsy sarisarina fiantohana nohon’ny fahalafosan’izany. Etsy an-danin’izany dia isan’ny lesoka mety hampahazo vahana ny Assurance manoloana ny trnga toy itony ny mbola tsy fisian’ny fikambanana miaro izay niharam-boina toy izao, na koa sehatra ahafahan’izy ireo mahazo ny zony. Ho sarotra amin’izy ireo ihany koa ny hanana mpisolovava hiaro azy ireo hatramin’ny farany nohon’ny falafosan’izany.
Eo anatrehan’izany rehetra izany dia nilaza ity mpahay làlana ity fa tsy misy afa-tsy ny fandraisan’ny Fanjakana andraikitra manokana amin’ny fitakiana ny marina rehetra ary amin’ny fanerena ny Assurance handoa izay tokony alohany momba an’iny fahavoazana iny no mety azoan’ireo fianankaviana niharan-doza an’izany. Tsy ampy arak’izany ny famangiana sy ny fanomezana fanampiana nataon’ny fanjakana. Fihetsika izay miaro fikatsahana tombontsoa manokana amin’izao ankatoky ny fotoam-pifidianana izao. Ny zava-dehibe dia ny fandraisan’ny fanjakana an-tanana ny raharaha ary ny fanampianay hatramin’ny farany an’ireo niharam-boina, indrindra amin’ny fazoan’izy ireo ny fanonerana ny fahavoazana nahaazo azy.
Tsara ny manamarika fa mahatratra hatramin’ny 400 000 000 ariary isaky ny olona niharam-boina ny vola mety alohan’ny Trano fiantohana amin’ny raharaha nahafatesan’olona toy izao.