Mpanefoefo Malagasy no nahazo azy?

08/12/2012

Loharanom-baovao azo antoka no nahafantarana fa hay mpanefoefo, teratany Malagasy ihany no nividy ary nahazo ilay fiaramanidin’ny Filoham-pirenena teo aloha, Force One II. Ity loharanom-baovao ity no nilaza fa fanarian-dia fotsiny ihany no nanelezana ny vaovao izay nilaza fa tompona trano filokana any Etazonia no nividy an’ity Fiaramanidina ity. Tsy nisy rahateo ny fanazavana ôfisialy avy amin’ny fitondram-panjakana mikasika an’izay famarotana ny Force One II izay.Mbola miandry fatratra ny fanazavana ôfisialy mikasika ny niafaran’ilay fiaramanidina nanenjehana an-dRavalomanana ny mpanara-baovao maro amin’izao fotoana izao. Ny hany fantatra mikasika azy hatramin’izao dia ny falasanany any ivelany taorian’ny filazana fa hamidy izany fiaramanidina izany.

Ny vaovao naelin’ireo gazety maro kosa dia samy nilaza fa mpandraharaha amin’ny sehatry ny filokana any Etazonia no nividy tamin’ny vidiny mora dia mora an’izany fiaramanidina izany.
Ny mifanohitra amin’izany anefa no marina raha araka ny loharanom-baovao azo antoka nefa tsy mitonona anarana. Araka ny nambaran’izany loharanom-baovbao izany dia mpanefoefo Malagasy ihany no nahazo an’ity fiaramanidina ity, ary fanarian-dia fotsiny ihany ny filazana fa tompona trano filokana no nividy azy. Raha izay no marina dia tsy isalasalana ihany koa ny milaza fa tsy lavitra an’ireo mpitondra amin’izao fotoana izao izany mpanefoefo izany. Tsy azo heverina tokoa, raha ny zava-misy amin’izao fotoana izao no hahazoan’ny olona tsy mitovy firenhana amin’ny mpitondra an’izao tetezamita izao an’izany fiaramanidina izany. Izany hoe ireo olona akaiky ny mpitondra ihany no heverina fa mahita ny ho enti-manana ahafahana mahazo izany fiaramanidina izany.
Tsiahivina fa manodidina ny 60 tapitrisa dolara no vidy nividianana ny Force One II, raha araka ny fanambarana nataon’ny filoha teo aloha. Manodidina ny 20 tapitrisa dolara kosa no nivarotana azy, raha araka ny vaovao an-gazety. Andrasana kosa izay fanazavana avy amin’ny fitondram-panjakana mikasika ny tena marina amin’ity raharaha ity.