Tetik’ady hanoherana ny fanampahan-kevitra any Dar Es Salaam?

08/12/2012

Hirotsaka mivantana amin’ny fampihaonana indray ireo vondrona sy antoko politika nanao Sonia ny tondrozotra ilay rafitra mpanara-maso ny fampiharana izany tondrozotra izany. Ny filohany, ny partora Péry Rasolondraibe no nanao izany fanambarana izany. Nilaza ihany koa ny tenany fa ny hametrahana fitoniana mialoha sy mandritra ary aorian’ny fifidianana no anton’izany fihaonana hatao izany.Mampametram-panontaniana ny anton’izao fivoriana tampoka izao, indrindra ny fandraisan’nanjaran-dRajoelina amin’izany kanefa nandà ny hanatrika ilay fivoriana tany Dar Es Salaam ity farany.mampametram-panontaniana ihany koa ny nazoan’ny CSC vola tampoka hikarakarana an’ity fampihaonana ity.

Efa fantatra avokoa ireo antony tsy mampitovy hevitra an’ireo mpanao politika, hoy ny fanambaran’ny filohan’ny CSC (Comité de suivi et de contrôle), rafitra natsangana tamin’ny alalan’ny fifanarahana voarakitra ao anatin’ny tondrozotra, ary natao hanaraha-maso ny fampiharana an’izany tondrozotra izany. Manoloana izany dia nilaza ihany koa ny Pastora Péry Rasolondraibe fa tokony hiravina avokoa ny olana noho izay fahafantarana ny fototry ny olana izay. Eo anatrehan’izany rehetra izany dia nilaza ny hamory an’ireo rehetra nanao Sonia ny tondrozotra, izany hoe ireo lehiben’ny vondrona na antoko nanao Sonia ny tondrozotra ny komity mpanara-maso ny fampiharana ny tondrozotra. Amin’ny faha 10-n’ny volana desambra izao no hanaovana an’izany fivoriana izany. Ankoatr’ireo ireo izay nanao Sonia ny tondrozotra dia isan’ny hasaina hanatrika izany ihany koa ireo filohan’ny andrim-panjakan’ny tetezamita, ka isan’izany ny Filohan’ny Tetezamita sy ny Praiminisitra lehiben’ny Governemanta.
Efa ho enim-bolana izao no nitsanganan’ny CSC n any komity mpanara-maso ny fampiharana ny sori-dalan’ny tondrozotra. Isan’ny sehatra efa nahafantarana azy ireo bebe kokoa ny zava-nitranga taorian’ny fananganan’ireo fiarahamonim-pirenena an’ilay komity Fampihavanana Malagasy. Ity farany izay voatery nofoanana taorian’ny fanaraha-maso ny fomba nananganana azy nataon’ny CSC. Hatramin’izao anefa dia tsy re intsony ny momba an’izany rafitra izany izay noheverina fa hiantoka manokana ny fametrahana ny fampihavanana eto Madagasikara araka ny toro-mariky ny tondrozotra ihany.
Na izany na tsy izany mampametram-panontaniana ihany koa ny fandrenesana izao fanampahan-kevitry ny CSC izao, taorian’ny tsy faneken’ny Filohan’ny tetezamita hanatrika ny fihaonana karakarain’ny Troika-n’ny SADC any Dar Es Salaam amin’izao fotoana izao. Misy ifandraisana ve ireo tranga roa ireo sa tsia?
Tsiahivina ihany koa fa isan’ny olana nambaran’ny filohan’ny CSC fa tsy nahafahan’izy ireo nanao ny asany araka ny tokony ho izy ny tsy fananana teti-bola ahafahany manao izany. Amin’izao fotoana izao anefa dia toa nahita vola ihany izany izy ireo. Avy aiza ary izany vola izany, ary nahoana no izao vao nahita an’izany izy ireo? Sao dia mba nomena vola mba azoana mikononkonona fivoriana hampandamoka ny fanampahan-kevitra mety ho raisin’ny SADC taorian’ny fihaonana tany Dar Es Salaam ity hatao amin’ny alatsinainy ity. Raha izany anefa no izy, manome toky ve ireo mpanara-maso ny fampiharana ny tondrozotra fa hahasoa ny firenena ary hitondra fitoniana araka ny nambarany izay tapaka amin’izany fihaonana amin’ny alatsinainy izany? Eo am-pandrasana mahita ny atiny.