Be vovok’aina !

17/10/2012

Ny mpandalo hono tia resaka ; ny iray tanàna kosa tia fosa! Tsy ny tany hono no fady fa ny vavam-bahoaka! Ny vao tsy manitra ihany hono no ratsy! Iza no tsy miresaka ity fanjakana ity ary iza no tsy mifosa ireo mpitondra ao aminy? Fa mbola eo ihany ry zalahy. Raha izay vavam-bahoaka mikasika ny fanamparam-pahefana sy ny didy jadona nataon’ny mpitondra nandritra iny taona 2009 iny no horesahana efa nianjera hatry ny ela io fitondrana io; kanefa dia mbola eo ihany ry zalahy. Im-piry nisafidy olom-baovao ny Malagasy nanomboka ny taona 1991 kanefa dia mbola izao ihany no zava-misy iainana. Tonga indray koa ny taona 2009, nirohotra nanaraka ny filoha Rajoelina ny vahoaka, nhevitra fa Izy ilay fanantenana hitondra fanovàna, kinanjo…

Inona no tsy niseho nandritra ity fitondrana Tetezamita tsy mety tapitra ity: FIGN, BANI, RFI, baomba artizanaly, grevy, tsy fandriampahalemana, tsy fisian’asa, Remenabila, fa mbola eo ihany ry zalahy. Be vovok’aina mihitsy ity Tetezamita tarihin’ny filoha Rajoelina ity hoy ny resaky ny tsy mahita atao. Taiza no mbola nisy fitondrana nahavita niharitra izany rehetra izany raha tsy ity Tetezamihitatra ity!
Fa nisy fitondrana be vovok’aina noho ny an’ny amiraly Didier Ratsiraka ve teto? Teo am-pelatanan’ny amiraly avokoa ny fahefana rehetra indrindra ny Foloalindahy. Mbola nanana ny TTS aza ny tenany, nentiny nampihorohoroana izay rehetra tsy nitovy hevitra taminy ka nahatonga ny “grand maître” Pierre-Be nandray fanapahan-kevitra nanafika izany toby izany tetsy amin’ny Pochard. Tsy nisy tsy natahotra izany RESEP izany ange fony paradia sosialista e!
Fa nisy fitondrana be vovok’aina mihoatra ny fitondran-dRavalomanana Marc koa ve teto? Natsangany avokoa rehefa mety ho sampan-draharaha hampateza ny fanjakany, toa ny Bianco, ny Samifin ary ny CIS. Nalaza koa ange izany GP izany ary tena ary fitaovana sy tsara fiofanana. Fa nankaiza avokoa izany rehetra izany; moa tsy tao anatin’ny indray mipi-maso monja dia voafafa tanteraka!
Efa tapitra hitan’ny Malagasy indrindra ny vahoakan’Antananarivo avokoa ireo hery vonjy taitra nihev-tena ho be vovok’aina toa ny FRS, RESEP, REGAP, GP, nampian’ny TTS sy ny maro tsy voatanisa. Saingy izao, tsy nahita ny lavaka nanitrihana ny lohany daholo ireo rehetra ireo rehefa nivadika sy tapa-kevitra ny vahoaka. Mahagaga sady mahavariana fa toa ririnin-dasa tsy tsaroana rehefa tonga eo amin’ny fitondrana. Namampatra ny heriny tokoa ny fitondram-panjakana Tetezamita amin’ny fanenjehana ireo rehetra tsy mitovy hevitra aminy; mihevi-tena ho be vovok’aina mitovy amin’iretsy mpitondra teo aloha ihany.
Lainga kosa aloha fa be vovok’aina ity fitondrana Tetezamita ity e! Tena vitany hatramin’izao ny nanidy ny vavahadin’ny kianjan’ny demôkrasia etsy Ambohijatovo ary tsy nisy nahavaky izany mihitsy.