Mifoha daholo an!

20/10/2012

Ny vaovao nanaitra ny saina indrindra tamin’ity herinandro madiva hifarana ity dia ny fiampangan’ny lehiben’ny Faritry Boeny an’Ambohitsorohitra, mazava ho azy ny filoha Rajoelina, mikasika ny fitantanana ireo vola be azo tamin’ny alalan’ny tetikasa Wisco ao Soalala, ka nilazany fa tsy misy tetikasa ara-tsosialy ho an’ny Faritra mihitsy amin’izany vola be izany. Raha nisy anefa tomponandraikitra niady mafy ho an’ity fitondrana tarihin’ny filoha Rajoelina ity dia mety mba anisan’ny voalohany ihany ny lehiben’ny Faritry Boeny ; tsy vitan’izany fa nandray anjara mavitrika mihitsy tamin’ny fandresen-dahatra ny vahoakan’i Soalala niaraka tamin’ireo minisitra maro voakasik’izany. Misy antony lehibe tokoa matoa nahateny izany ity manampahefana ity.

Toraka izany koa ny any Toamasina. Re mantsy izao fa tsy manaiky ny fanjakazakana nataon’ny filoha Rajoelina sy ny mpiara-dia aminy intsony ireo olobe sy ray aman-dreny ary ny vahoakan’i Toamasina, indrindra ny fitantanana ny vola be nomen’ny Sherrit izay tokony hanaovana tetikasa ara-tsosialy kanefa avilin’ny mpitondra any amin’ny propagandy mialoha ny fotoana. Efa maro ireo fanambarana mitsipaka izany fihetsiky ny mpitondra fanjakana izany.
Naneho firaisan-kina tamin’ireo namany ao amin’ny Sempama tapaka karama ihany koa ny mpiasan’ny ministeran’ny Fahasalamana ka nadray fanapahan-kevitra nanidy ny varavaran’ny birao tao amin’izany ministera izany. Ny sendikan’ny mpiasan’ny Kraoma moa dia iny vao avy nametra-panontaniana momba ireo volamena 12 kg voaangona nandritra ny taona maromaro. Nosamborina ary natolotra ny Fampanoavana mihitsy moa ny roa tamin’ireto mpitarika sendika ireto noho ny fitakian’izy ireo ny tokony hametrahana rafitra vaovao hiantohana ny fampandehanana ny orinasam-panjakana Kraoma araka ny tokony ho izy.
Inona no tiana hambara amin’izany rehetra izany? Mifoha amin’ny torimasony daholo ankehitriny ny olom-pirenena manoloana ny fahalovana sy ny fahasimban’ny fiaraha-monina noho izao fitondrana tarihin’ny filoha Andry Rajoelina izao. ny fampisotroana zava-pisotro mahamamo sy ny fampilokana vahaoaka no hany sisa vahaolana hitan’ny fanjakana rehefa tsy nampihemotra ireo tia tanindrazana hilaza ny marina ny jadona sy ny fampihorohoroana amin’ny endriny maro (fisamborana, fiantsoana eny amin’ny mpitandro filaminana, fisavana trano, sns). Raha vidim-bary 500 Ar sy menaka 2500 Ar no nampanantenain’ny filoha fony mbola teny an-kianja; saran-dalana 400 Ar, tsy fandriampahalemana, fahantrana, kolikoly, lainga, jadona no misy sy iainan’ny vahoaka rehefa tafapetraka teo amin’ny fitondrana.
Taitra tamin’ny torimasony avokoa ny olon-drehetra. Tao moa ireo tsy natory akory fa nanao be marenina fotsiny noho ny tombotsoa manokana, nisy kosa ireo natahotra lakrimôzena, sns. Ny mahavelombolo ao anatin’izany rehetra izany dia ny fahitana fa mbola misy tia tanindrazana eto amin’ity Madagasikara ity, hitarika ny vahoaka ho any amin’ny lalana marina sy mahitsy, hisian’ny tena fampandrosoana. Mifoha daholo an!