Hosoka anaty hosoka !

16/10/2012

Tsy niandry ela ny valin-kafatra avy tamin’ireo orinasa nambaran’ny tangalamena Zakariasy fa tompon’antoka tamin’ny fanondranana an-tsokosoko ireo « bois de rose » ny volana aprily 2012 ary nanambara tsotra izao fa hosoka avokoa ireo antontan-taratasy nasehon’ity tangalemana ity tamin’ny mpanao gazety nandritra ilay valan-dresaka tetsy amin’ny Colbert. Hosoka sy fampiasana hosoka no niampangan’ny tangalamena Zakariasy ireo taratasy namoahana ireo andramena 10 « containers » ; izao indray koa voalazan’ireo « voampanga » fa hosoka ny taratasy teny am-pelatanany. Tsy fantatra intsony izay manana ny marina manodidina ity raharaha ity ; ny antontan-taratasin’iza no hosoka sa sanatrian’izany hosoka anaty hosoka indray koa ?

Tokony hisy fanadihadiana hisokatra araka izany hahafantarana izany tena milaza ny marina sy ny manana antontan-taratasy hosoka eny am-pelatanany. Hatreto mantsy dia mbola “paroles contre paroles” no misy ary tsy mbola nahavita nanaporofo tamin’ny alalan’ny antontan-taratasy maha hosoka ny any am-pelatanan’ny tangalamena Zakariasy ireo orinasa voaresaka. Mbola mijanona eo amin’ny lafiny ady ara-tserasera ny roa tonta; azo antoka koa anefa ny tsy maintsy hisian’ny ady ara-pitsarana.
Tsy nandrenesam-peo intsony koa ny tangalamena Zakariasy taorian’ny lahatsoratra an-gazety maro nivoaka ny alatsinainy 15 oktobra lasa teo, niampy ny fanambarana niarahan’ireo orinasa rehetra, izay efa nampitandrina sahady fa hitondra ny raharaha eny anivon’ny Fitsarana noho ny fahavoazana natrerak’iny valan-dresaka an-gazety ny zoma 12 oktobra iny. Mifampiampanga amina hosoka sy fampiasana hosoka ny an-daniny sy ny an-kilany ary samy mitompo teny fantatra amin’izany. Iza anefa no afaka hanota ireny taratasy hosoka ireny raha tena hosoka marina ireo izay naseho sy nozarain’ny tangalamena Zakariasy tamin’ny mpanao gazety? Tsy maintsy olona mahalala amin’ny ampahany na amin’ny antsipirihany ny fizotry ny taratasy sy ny dingana tokony ho arahana amin’ny famoahana na fampidirana entana eny anivon’ny ladoany.
Ny Hitsikitsika tsy mandihindihy foana, hoy ny Ntaolo. Eo indrindra no hametrahana fanontaniana eo anatrehan’izao zava-misy izao: “nampiasa ny hainoamanjery ho amin’ny tanjony manokana ny tangalamena Zakariasy sa kosa ny fanjakana no marisrisa tamin’ny ampamoaka izay nataony?”. Amin’ny fomba ahoana koa hinoana ny fahamarinan’ny antontan-taratasy sy ny fanambarana izay milaza fa hosoka ireo antant-taratasy nandritra iny valan-dresaka an-gazety iny?
Ny azo ambara ao anatin’izany rehetra izany dia ny fahalemen’ny fitantanan-draharaham-panjakana amin’ny ankapobeny. Antontan-taratasy mahakasika ny fanjakana sy ny fitantanan-draharaham-panjakana avokoa mantsy ireo nasehon’ny tangalamena Zakariasy tamin’ny zoma 12 oktobra iny, raha tsy sanatria tsy hosoka araka ny fanambarana niarahan’ireo orinasa voakasika.