« Casserole » sy « cocotte » !

18/10/2012

« Tsy izy intsony mihitsy ity fitondrana tarihin’ i Andry Rajoelina ity ». Tsy misy tsy miteny izany hatramin’ny zaza vao teraka. Marina izany, fa ahoana no tohiny? Eo no fanontaniana goavana sady saro-baliana indrindra. Raha ndeha aza ka hoe mirodana io fitondrana lazaina fa « tsy izy intsony io » dia iza no homena ny fitondrana? Homena ny Tafika? Mbola manana olona mendrika hitondra Fanjakana ve izany Foloalindahy Malagasy izany? Homena ireo filoha teo aloha araka ny tapak’ireo mpizaika tetsy amin’ny « espace mon goutter »? Azo antoka koa ve fa tena hifanaraka izy ireo sa vao mainka hiteraka krizy hafa indray ? Homena mpanao politika ? Iza amin’ireo mpanao politika miseho masoandro ireo no tsy mitarika « casserole ».

Iza àry e? Zafy Albert, Didier Ratsiraka, Ravalomanana, Ratsirahonana, Tantely Andrianarivo, Roland Ratsiraka, Manandafy, Monja, Voninahitsy, Rajemson, Pety, Lahinirko, Ravaloson Clément, Beriziky, Beranto, Lanto Rakotomavo, Tabera, Miandrisoa Marcel, Raveloson Constant, Rasambozafy Cyril, maître Avoko, Raholdina, Rév Ndriamanampy, Rabetsitonta,…?
Tsia avy hatrany ny valinteny; tsy misy na dia iray amin’ireo mpanao politika miseho masoandro etsy sy eroa ireo mendrika hitondra firenena. Tsy vitan’izany fa mpanao politika tsy vonona hanetry ny tena ary tsy hanaja tena. Ny mpanao politika eto amintsika mantsy sady filohan’ilay antoko, fa ny tenany mihitsy no antoko: RPSD midika ho Voninahitsy, Arema midika ho Ratsiraka, Tim midika ho Ravalomanana, TGV midika ho Rajoelina, Mfm midika ho Manandafy, sns. Izany hoe, tsy hanome tanana ary tsy hanaiky hanana mpandimby izany; miara-maty aminy ny antokony.
Fantatry ny filoha Rajoelina sy ny manodidina azy tsara fa tsy manana fitokisana amin’ireo mpanao politika hitan’ny voamasony ireo intsony ny vahoaka ary izay no mibaiko izao zavatra ataony izao. Fantatr’ireo mpanao politika ireo ihany koa izay fankahalan’ny vahoaka azy ireo izay ka dia aleon’izy ireo mialokaloka mody manohana ny fitondrana Rajoelina na ny manohitra izany fitondrana izany, hilazana fa « j’existe ». Izay no zava-misy eto amin’ny firenena ; izay no mahatonga ny sata mifehy mpanao politika tsy mety tafapetraka; izay no mahatonga ny fisian’ireo antoko politika an-jatony tsy misy antony ireo.
Tsy eo amin’izay ho mpandimby rahatoa ka misy ny firodanan’ny fitondrana Tetezamita ihany no hipetrahan’io fanontaniana goavana hoe « iza ? » io fa hatrany amin’ny fifidianana mihitsy. Iza amin’ireo efa mitonona ho kandidà filoham-pirenena na ireo manao propangady alohan’ny fotoana no mendrika izany andraikitra masina izany ? Andry Rajoelina, Monja Roindefo, Patrcik Raharimanana, Beranto Alexandre, Vahombey,… ? Tsia avy hatrany ny valinteny. Ny sasany efa manana « casserole »sy « cocotte »mitaritarika; ny hafa kosa manao varotra omby anaty ambiaty, na ny fianakaviany aza mety tsy hifidy azy 100%. Fehiny, lany olomanga ny firenena.