Ambina fotaka ?

23/10/2012

Tsy miteniteny foana ihany ireny mpamorona hatsikana ireny indraindray, rehefa mitazana ny zava-misy indrindra ho antsika Malagasy. Misy « blague » izay tokoa mantsy milaza fa ambina fotaka hono no nanamboarana ny Malagasy. Fotaka karazany maro no teo an-tananan’Ilay Nahary; tao ny ny mainty, ny fotsy, ny mavo, ny mena. Ny fotaka mainty nanamboarana ny Afrikana, ny fotsy nanamboarana ny Tandrefana, ny mavo nanamboarana an-dry zareo Aziatika ary ny mena naomlavolana an-dry zareo Amerikana. Nisy ambiny ireo fotaka ireo ary efa nokasaina hariana kanefa dia tapa-kevitra indray Ilay Nahary fa hanamboarana izay vitany. Dia nafangaro ireo karazana ambina fotaka ireo ary nanamboarana antsika Malagasy ka izany hono no mahatonga antsika ho mainty, fotsy, mena, mavo ary ny zarazara hoditra. Izany ihany koa hono mahatonga antsika sady tsy Afrikana no tsy Tandrefana no tsy Aziatika, sns. Ary mbola izany hatrany hono no mahatonga antsika hanana fisainana tsy fantatra hoe ahoana tahaka izao: manana avara-pianarana sy olon-kendry maro kanefa hanjakan’ny jiolahy amin’ny sehatra rehetra.

Tsy handeha lavitra isika, ndeha horaisina ohatra fotsiny ny mikasika ireto mpitondra “scooter” ireto. Nanao hetsika ny mpitandro filaminana, nisakana sy nitazona ireo rehetra tsy manao aroloha; “scooter” am-polony maro no voatàna teny amin’ny kaomisaria. Ny ampitson’iny, nanao aroloha avokoa ny mpitondra “scooter” rehetra teto an-drenivohitra. Telo andro ihany no nanaovan’ny mpitandro filaminana izany hetsika fanairana sy fampahatsiahivana izany. Vao nijanona ny hetsika dia indro miverina amin’ny fanaony indray ireo mpitondra “scooter”; tsy misy manao aroloha. Tena ambina fotaka tokoa àry ve izany no nanamboarana antsika Malagasy e? Ho fitsinjovana ny ain’ireo mpitondra “scooter” no mahatonga ny mpitandro filaminana mampahatsiahy azy ireo ny tokony hanaovana aroloha fa tsy sanatrian’izany hampanan-karena ny pôlisy sy ny zandary akory. Sa mieritreritra izy ireo fa mbola misy ambiny fotaka any an-danitra any hanamboarana solony raha sanatria ka maty vaky loha izy ireo?
Ho avy indray koa izao ny fahavaratra ary mety hisesisesy ny rivodoza. Ho sasatra indray izao ireo tomponandraikitra hanentana ireo mipetraka amin’ny faritra iva mety ho tratran’ny safo-drano satria tsy hiala eo mihitsy ny olona voakasik’izany, kanefa fitsinjovana ny ainy no anton’izany. Izay no hilazana hoe ndrao sanatria tokoa ary ambina fotaka no nanamboarana antsika ity ka lasa ambinambin-javatra tahaka izany koa ny toe-tsaina! Mahavariana mihitsy isika Malagasy ary tsy mahagaga raha krizy lava tahaka izao no iainana. Tsy hisy eto Madagasikara velively izany fandrosoana izany raha mbola toe-tsaina mirefarefa amin’ny tany tahaka izao.
Ary mety hono isika namboarina avy tamin’ireo ambina fotaka ireo ihany koa no mahatonga izao fisaraham-bazana izao satria karazam-potaka tsy mety hitambatra no nafangaro. Tsotra sy mazava ny olana manodidina io resaka fodian’ny filoha teo aloha io: resa-poko! Nolazaina mantsy fa tsy tia Tanindrana sy olo-mainty Ravalomanana Marc. Fa mba firy moa ny Tanindrana niditra am-ponja nandritra ity Tetezamita ity, raha tsy hiresaka afatsy ireo manamboninahitra fotsiny ihany?