4’mi manara-penitra!

29/10/2012

Tsy mahatamàna ny Malagasy intsony ve any an-tokantranony sa teren’ny adim-piainana sy ny tsy fisiana ka tsy maintsy mivoaka ny trano na alahady aza? Feno olona toa ireny andavanandro ireny ny arabe sy ny tsena omaly. Analakely, Isotry, Mahamasina, sns. Marina tokoa fa misy ireo tena miantsena izay vitsy raha hoarina amin’ireo mivenjivenjy tsy manana anton-dia na tanjona voafaritra. Ho aiza ary mitady inona?

Porofon’ny faharavan’ny fiaraha-monina ny fahamaroan’ny olona mifamezivezy an-dalambe amin’ny andro tsy fiasana sady andro fitsaharana rahateo. Andro natokan’ny Malagasy ho an’ny ankohonany ny alahady tany aloha. Io no hany fotoana hitafan’ny ray aman-dreny amin’ny zanany, fotoana hiarahan’ny mpianakavy misakafo ary fotoana hialana sasatra ihany koa. Saingy noho ny hetraketraky Rafahantrana dia voatery mandao ny tokantranony ny olona: tsy laharam-pahamehana intsony ny dinika ambany tafontrano eo amin’ny zanaka sy ray aman-dreny, tsy miray latabatra intsony ny mpianakavy (tsy misy hohanina rahateo) ary efa ela no niakanjoan’ny nofy izany fialan-tsasatra izany.
Lasa tsy mahatamana intsony ilay tokantrano satria anarana fotsiny sisa ilay ankohonana. Toeram-patoriana amin’ny alina mitovy amin’ny hotely sisa ilay tokantrano, mba tsy hitoviana amin’ireo 4’mi matory an-dalambe. Fa raha ny marina dia efa 4’mi avokoa ny ankamaroan’ny Malagasy. Firy isan-jaton’ny ankohonana eto an-drenivohitra ohatra fotsiny no afaka mitsangatsangana amin’ny fiara miala ny renivohitra, firy amin’ny ankohonana no afaka mandeha mamangy ireo havana sy fianakaviana? Izany anefa no nanokanan’ny Malagasy ny andro alahady tany aloha.
Tsy ny tsena na ny arabe irery ihany anefa no be olona fa indrindra koa ny fonja etsy Antanimora. Nitombo izay tsy izy ny isan’ny olona migadra nandritra izay krizy izay: ao ireo migadra noho ny antony ara-politika; ao koa anefa ireo migadra noho ny asa fisolokiana, ny halatra, ny fivadiham-pitokisana, sns. Ny alahady irery ihany sisa no andro ahafahan’ny fianakaviana mamangy sy manatitra sakafo ho an’ireo solafaka. Tsy araky ny eo am-pelatanana ny fanaterana sakafo isan’andro sady tsy manana fotoana ho amin’izany rahateo noho ny fitadiavana. Azo antoka mihitsy fa misy amin’izao gadra tsy nahita ny havany efa am-bolana maro satria samy miady amin’ny fiainana avokoa na ny ety “ambony tany” na ireo eny “ambony sambo”.
Tsy mahataitra ny mpanao politika sy ny mpitondra izany rehetra izany; tsy izany velively ny olan’izy ireo fa izay fomba hamenoana paosy sy hampateza eo amin’ny fitondrana na koa ny hahazoana izany fitondrana izany, hitsentsefana izay hany kely navelan’ny teo aloha. Rava ny fiaraha-monina Malagasy, rava noho ny fitiavan-tenan’olom-bitsy. Anarany fotsiny sisa ny hoe ankohonana sy tokantrano. Efa 4’mi manara-penitra indray izao ny vahoaka 20 tapitrisa.