Jamba milomano !

08/11/2012

Re izao fa tena nihaona tamin’ny SADC ireo manamboninahitra manohitra izao rafi-pitondrana tarihin’ny filoha Andry Rajoelina ary noraisin’ny SADC tsara mihitsy ny soso-kevitra hivoahana amin’izao krizy izao avy amin’ireto manamboninahitra ireto. Re ihany koa fa nisy fivoriana sy fihaonana natrehana manamboninahitra jeneraly tao amin’ny trano fonenan’ny filoha teo aloha, Zafy Albert etsy Ivandry ary mbola nisy ihany koa fivoriana hafa tany Tsaralalana tany, raha ny vaovao azon’ny mpanao gazety.

Mivory daholo koa ireo antoko sy fikambanana mpanao politika ; ny praiminisitra Omer Beriziky rahateo koa efa nanambara ny heviny mikasika ny fifidianana ka nilazany fa vahaolana tsara indrindra ho an’ny firenena ny tsy filatsahan-kofidian’ireo filoha teo aloha ary ny filohan’ny Tetezamita. Ny filoha nasionalin’ny antoko Monima, Monja Roindefo moa dia iny efa nilaza mahitsy iny ny tokony hialan’izao mpitondra tsy afaka ny hiantoka ny fiarovana ny ain’ny olona sy ny fananany ary indrindra ny tsy fahavononana hampihatra ara-bakinteny izay voalazan’ny Tondrozotra.
Etsy an-danin’izany ny raharaha any Atsimo izay efa miteraka resabe tokoa, raha tsy hilazana afatsy ny fanambarana nataon’ny antoko Monima, ny amin’ny fampiasan’ireo Foloalindahy manatanteraka ny hetsika Tandroka, fitaovam-piadiana mahery vaika toa ny RPG-7, hitifirana zaza amam-behivavy. Tsy horesahana intsony ny fahalemen’ny fitondrana teo anatrehan’ny fandrahonana nataon’ny mpiandry fonja izay niteraka lonilony teo amin’ny ministry ny Foloalindahy, ny SEG ary ny ministry ny Fitsarana.
Ankoatra izany rehetra izany ny fahapotehan’ny rafi-piaraha-monina vokatry ny fahantrana lalina manjo ny vahoaka, ny fiakaran’ny saram-pitaterana, ny tsy fisian’asa, sns. Ilay maha izy azy ny fiaraha-monina Malagasy mihitsy ankehitriny no potika vokatr’izao krizy lava tsy mety hifarana izao. Fahoriana sy ranomaso ary fitarainana no re eny anivon’ny fiaraha-monina. Midradradradra noho ny hanohanana ny ankizy; very fanahy mbola velona ny olon-dehibe.
Minia tsy mahita izany ve ireto mpitondra ireto sa manao toa ny jamba milomano ka izay hidonan’ny loha no hiakarana? Inona izao no fanovàna noentin’izao fitondrana Tetezamita tarihin’ny filoha Rajoelina izao? Nihena ve ny kolikoly, niha nitombo ve ny tany an-tsikinan’ny olom-pirenena, foana ve ny asan-jiolahy? Tsy mahita ny zavatra eo ambany masony ve ny mpitondra sa efa nisafidy ny aleoko maty hifikitra amin’ny seza?
Ka mba aoka re tsy hanao jamba milomano fa ny firenena iray manontolo sy ny vahoaka 20 tapitrisa no lasa sorona tsy fidiny. Aoka mba hibanjina zavatra lavitra sy matotra hanjakan’ny tena fitiavan-tanindrazana. Am-pototry ny korontana sy ny ady an-trano noho ny fitiavan-tenan’olom-bitsy ny firenena. Tsy mendrika izao fahoriana manjo azy izao ny Malagasy satria tsy nahavita heloka izy fa natao tohatra fiakarana hatrizay nisian’ny fihetseham-bahoaka teto izay.