Vonjeo !

09/11/2012

Noheverina ho efa niakanjoan’ny nofy ny rezima sosialista nampanjaka ny sivana sy ny jadona teo amin’ny asa fanaovan-gazety kinanjo…nofy ihany tokoa izany. Tsy mbola nisy fanjakana nampahory ny asa fanaovan-gazety sy ny mpanao gazety mihoatra noho ity HAT lasa Tetezamihitatra ity. Hatramin’ny famoahana valan-dresaka an-gazety avy no hiakarana eny amin’ny mpitandro filaminana ankehitriny. Mety hahitan-doza ihany koa raha izao no mitohy ny famoahana valan-dresaka ataon’ny mpitandro filaminana. Firy akory izay olona nambaran’ny mpitandro filaminana fa jiolahy sy mpiray tsikombakomba amin’ny olon-dratsy izay kanefa nahazo fahafahana rehefa tonga teny amin’ny Fitsarana. Ny raharaha Mpiandry fonja no ohatra akaiky indrindra. Sa rehefa ny fanjakana no miteny izay tiany hambara dia marina zato isan-jato; lainga sy tsy marim-pototra kosa rehefa ny hafa?

Ohatra iray koa ny valan-dresaka an-gazety nataon’ny ministry ny Tontolo Iainana teo aloha, Joseph Randriamiandrisoa, mikasika ny resaka fanondranana “bois de rose” izay nitoriana ny gazety Tia Tanindrazana, Ma-laza ary ny radio Free FM. Ilay tomponandrikitra izao no manambara amin’ny hainoamanjery ny anaran’ireo mpanondrana “bois de rose”; dia mbola ny mpanao gazety ihany koa miakatra eny amin’ny mpitandro filaminana. Izany hoe raha vao miala ao anatin’ny governemanta izany ny tomponandraikitra iray dia lainga sy tsy mari-pototra avokoa ny vaovao homeny ny mpanao gazety?
Teo aloha dia ny mpitandro filaminana tsotra izao no miditra anaty gazety manery ny tomponandraikitra hilaza ny loharanom-baovaony, tahaka ny nanjo ny Le Courrier. Nararadraraka tahaka ny fasika indray taorian’izany ny “lettre de mise en demeure”. Nivoatra hatrany izany endrika jadona izany ary ankehitriny, lasa heloka ny fitaterana vaovao mivoaka avy amina valan-dresaka ho an’ny mpanao gazety amina toerana azon’ny rehetra handehanana (lieu public). Maninona raha tsorina fotsiny ny resaka dia vita e ! Lazao ho ren-tany ren-danitra fa ny vaovao mandoka sy manafosafo fitondrana sy izay rehetra mpiara-mihinana ao anatin’izany fitondrana izany ihany no azon’ny hainoamanjery resahana mandritra ity Tetezamita ity !
Toa izany mantsy no fanirian’ity fitondrana ity ka izay rehetra tsy mizotra manaraka “iny lalana iny” dia ny mpitandro filaminana sy ny Fitsarana no miandry azy. Haingana noho ny tselatra ny fahatongavan’ny taratasy fiantsoana rehefa ny fanjakana sy ny mpiara-mihinana aminy no mitory ; manjavona tsy hita popoka tahaka ny fitorian’ny profesora Zafy Albert kosa rehefa fitoriana manelingeina ny mpitondra.
Koa raha valan-dresaka ho an’ny mpanao gazety no efa loza mitatao ho an’ny asa fanaovan-gazety ; sahala amin’ny ahoana ny zavatra mety hitranga mandritra ny fifidianana ? Sa izay no antony nanofanana ireo mpanao gazety farany teo ireny mba tsy hilaza afatsy izay vaovao metimety sy mifanandrify amin’ny bilon’ny mpitondra? Vonjeo !