Hafa kely iny !

15/10/2012

Samy nahamarika avokoa angamba ny mpamaky gazety tamin’ny sabotsy lasa teo fa tsy nisy sahy nitonona ny anaran’ny PDG groupe Sodiat avokoa ny ankamaroan’ny gazety mpivoaka isan’andro raha voatonona mazava tsara tao anaty lahatsoratra kosa ny orinasa Mainland Mining LTD. Natao fotsiny hoe « miliardera iray » dia anjaran’ny mpamaky no maminany hoe iza io miliardera io. Ny sasany moa dia tsy namoaka ilay vaovao mihitsy.

Hafa kely mihtsy ity sehatry ny asa fanaovan-gazety eto amintsika ity ary mampametra-panontaniana hoe: “fa nahoana no sahin’ireo gazety hany mba namoaka ny valan-dresaka nataon’ny tangalemana Zakariasy Patrick ny nitonona ny anaran’ny orinasa Mainland Mining; inona kosa no antony tsy nitenenana ny anaran’ny PDG-n’ny orinasa Sodiat kanefa dia samy voalazan’ny mpanao valan-dresaka avokoa ireo anarana roa ireo?”. Maro tamin’ireo mpamaky gazety no nametra-panontaniana noho iny zava-niseho tamin’ny sabotsy iny ary nanontany tena mihitsy ny maha izy azy ny gazety sy ny hainoamanjery amin’ny ankapobeny eto amintsika.
Ny mpanao gazety Malagasy no anisan’ny mora tohina indrindra raha vao misy fihetsika heveriny fa manohintohina ny asa fanaovan-gazety: tsy navela nanatrika “conference de presse” na tsy nahazo niditra tamina fampisehoana, na nahazo teny hafahafa taman’olona, sns. Midradradradra ny fahafahan’ny asa fanaovan-gazety isika kanefa ny mpanao gazety ihany no mitsipaka sy mandà izany amin’ny fotoana tokony hanatanterahany an-tsakany sy an-davany ny andraikiny, dia ny filazana ny zava-misy eto amin’ny firenena. Mampieritreritra mihitsy ny anton’ny mizana mitanila nataon’ny hainoamanjery sasan-tsasany teo amin’ny orinasa Mainland sy Ravatomanga Mamy, izay samy voatoatin’ny valan-dresaka an-gazety nataon’ny tangalemana Zakariasy Patrick!
Betsaka ny vaovao re ny alin’ny zoma 12 oktobra 2012, izany hoe ny harivan’ny valan-dresaka tetsy amin’ny Colbert. Toa hoe nisy fitetezana desk izany tamin’io alina io ka asa raha misy hifandraisany tamin’izany ny antony nahatonga ny mizana mitanila teo amin’ny orinasa mpitrandraka fasimainty sy ny PDG groupe Sodiat? Ny azo ambara fotsiny dia ny hoe: “hafa kely indray iny!”. Ny azo ambara manaraka izany koa dia ny hoe mbola ho ela ary tsy ho tratra na oviana ny tanjona ny amin’izany fahafahan’ny asa fanaovan-gazety izany raha mbola ohatra izao zava-misy izao ny fomba hanatanterahan’ny mpanao gazety ny andraikiny.
Mahavariana ary tena hafa kely tokoa iny zava-nitranga iny. Tsy nahagaga ny maro sy ny mpanara-baovao ihany koa anefa. Mbola tsy vita akory ny valan-dresaka nataon’ny tangalamena Zakariasy Patrick dia efa nahafantatra ny ankamaroan’ireo nanotrona sy ny mpanara-baovao fa tsy maintsy hisy “gymnastique” goavana eny anivon’ny hainoamanjery. Izany hoe efa tsy vaovao amin’ny mpanar-baovao intsony ny fomba fiasa manodidina ity asan-gazety ity izay tena mampalahelo sady mahamenatra rahateo.