Manangatra ?

31/10/2012

Mampitodika ny maro amin’ny zavamisy eto amin’ny firenena izao fahatsiarovana ny maty izao, indrindra moa fa ny fanomezan’ny fitondram-panjakana ireo andro tsy iasana nefa andraisan-karama mifandraika amin’ny fetin’ny olo-masina sy ny fetin’ny maty izao. Ilaina ve izany fahatsiarovana ny maty izany raha toa ka tsy mikaroka ny fomba hampihenana ny isan’ny maty isika ?

Mampitodika bebe kokoa amin’ny zava-misy eto amin’ny firenena izany fahatsiarovana izany satria tsy misy tsy mahita angamba ny rehetra fa efa zary mahazatra amin’izao fotoana izao ny mahare faty olona, na vono olona, indrindra hatramin’ny nampirongatra ny raharaha halatr’omby any atsimo.
Santionany amin’izany ny fijoroana ho vavolombelona tamin’ny alalan’ny fandefasana sary avy any amin’ny distrikan’i Betroka izay nataona Pastora iray any an-toerana ary nandefa izany nandritra ny fanambaran’ireo ao amin’ny hetsiky ny mpitondra fivavahana omaly. Sary mampihoron-koditra maneho ny vono olona miseho any antsimo amin’izao fotoana izao no hita nandritra io fanambarana io. Mbola izany fijoroana ho vavolombelona izany ihany koa no milaza fa mahatratra 80 ny isan’ny olona maty isaky ny hetsika ataon’ny mpitandro filaminana any an-toerana. Nambaran’ny mpandaha-teny fa tafiditra ary maro amin’ireo mamoy ny ainy no tsy manan-tsiny na koa tsy misy ifandraisany amin’ny daahalo.
Ny mahagaga amin’ity raharaha ity dia ny fahanginan’ireo mpitondra amin’izao fotoana izao, indrindra ny minisitry ny fitsarana sy ny tontolon’ny fitsarana izay voahitsakitsaka tanteraka hono izao zava-misy any atsimo izao. Inona tokoa moa no ilana azy ireo raha toa ka ttsy ampandalovina fitsarana intsony ny olona fa avy dia ajedaga rehefa monina any amin’ny faritra ahina ho mifandray amin’ny asan-dahalo ? Etsy an-danin’izany, mampametram-panontaniana ihany koa ny fihetsiky ny mpitarika ny mpitandro filaminana izay minia tsy mitondra fanazavana azo antoka mikasika izao raharaha any atsimo izao. Satria raha misy ary atao mangarahara ny fitondrana izany rehetra izany dia ho hita mibaribary raha toa ka tsy misy vono olona faobe tokoa any amin’izany faritra izany. Raha araka ny tokony ho izy dia tokony niantso ary nitondra ny mpanao gazety tsy an-kanavaka tany amin’izany faritra anaovana hetsika izany ny mpitandro filaminana mba hitateran’izy ireo an-kalalahana ny zava-misy ataon’ireo miaramila nalefa any an-toerana.
Tsy hitovy amin’ny isan-taona arak’izany ny fanamarihana ny fetin’ny maty amin’ity indray mitoraka ity, indrindra any amin’ny faritra izay nahitana faty olona be indrindra vokatry ny fifandonana teo amin’ny mpitandro filaminana sy ny dahalo. Mazava loatra fa hiova ny fiheverana ny maty, ka tsy ho razana mitahy, araka ny fionana nentim-paharazana intsony izy ireo fa toy ireny maty an’ady tsy misy mpahalala ireny, ary mety hisalotra ny maha dahalo mandrakizay tsy fidiny aza ny sasany na dia mety tsy ho isan’izany, araka ny efa nambara tetsy aloha.