Efa maty mialoha !

26/10/2012

Malaza ho maimbo razana ny tanety any Atsimo any ankehitriny, vokatry ny tifitra vary raraka ataon’ireo miaramila mirongo fiadiana mahery vaika fampiasa amin’ny tany miady ; tsy fantatra mazava rahateo ny isan’ny maty any an-toerana na dia azo antoka aza fa maro. Tsy lavitry ny zava-nitranga tany Rwanda ny fifamonoana any Atsimo. Nifamono ihany koa mantsy ny samy sivily; tsy nisy fanjakana nahasakana izany intsony. Firy volana izay no nandrenesana io fandatsahan-drà sy fifamonoana tany Atsimo io kanefa tsy misy mitsangana eo anatrehan’izany ireo ray aman-dreny, avara-pianarana, mpanao politika zanaky ny Faritra Androy sy Anosy.

Ny praiminisitra teo aloha Monja Roindefo sy ny depiote teo aloha Mara Niarisy irery izao no naneho ny heviny sy nandroso vahaolana mikasika io raharaha any Atsimo io. Fa aiza ny hafa toa an-dry Velompanahy Aristide, Reboza Julien sy ny maro tsy voatanisa sa kosa efa maty mialohan’ireto vahoaka sy tanora ripadripaky ny bala sy ny « roquette » ireto? Mampieritreritra mihitsy, izao tokoa no tonga amin’ny fiteny hoe : « ny nantenain-kanirina no nampivandravandra ! ».
Miha mazava amin’ny vahoaka izao ny antony nanakatonana ny Free FM ary ny nanenjehana an’i Lalatiana sy Fidèle. Tsy zakan’ny Fanjakana mihitsy ny filazana ny marina eto amin’ny firenena. Ny onjampeo 104.2 no niresaka voalohany indrindra ity raharaha Remenabila ity. Voaporofo avokoa ny voalazan’izy mianadahy ankehitriny ary efa tamin’izany no nilazan’i Lalatiana sy Fidèle fa loza mihantona ity resaka asan-dahalo any Atsimo ity raha tsy mandray fepetra haingana ny fitondram-panjakana. Saingy maty na novonoina mialohan’ny fotoana moa ilay onjampeo ka toa ririnin-dasa tsy tsaroana izay rehetra nambaran’izany radio izany.
Toraka izany koa ny resaka « bois de rose », antony nisamborana sy nitànana « violon » azy mianadahy ireto teny amin’ny zandarimaria. Izao nefa niaka-tsehatra mihitsy ny tangalamena Zakariasy Patrick, nanao ampamoaka mikasika io fanondranana an-tsokosoko andramena io ary nametraka fitoriana eny amin’ny Bianco mitovy tamin’ny nataon’ireo mpanentana tao amin’ny Free FM. Dia sanatria koa ve efa maty mialohan’ny fotoana izany fitoriana rehetra izany?
Ka fanovàna inona ity resahana lava isaka ny mikabary ity e? Fitiavan-tanindrazana ahoana no tian’ny sasany hambara isaka ny misokatra ny vavany? Efa maty mialohan’ny fotoana ny fanantenan’ny vahoaka; efa lasan-ko razana ilay hambom-po nivaivay fony mbola teny an-kianja. Maizina tanteraka ny ho avin’ny firenena; toa ady an-trano sy fifamonoana eo amin’ny samy Malagasy indray aza no mety hitranga raha mitohy izao fanapahan-kevitra samy irery raisin’ny filoha Rajoelina izao.