Aza manantena ny ho voafidy

27/10/2012

Tanteraka tokoa ankehitriny ny ahiahin’ireo irey tsy nakasitraka ny fanonganam-panjakana nitranga teo amin’ny firenena ka nametrahana an-keriny an’izao fitondrana misy izao. Tsy vitsy tokoa no nahita tamin’ireny fotoana ireny fa saika ireo mpanao politika sy mpandraharaha tsy manan-kevitra ny hitsinjo ny tena tombon-tsoam-bahoaka sy ny tombontsoam-pirenena ireo nanohana sy nampahomby an’iny lazaina fa tolom-bahoaka nandrodanana ny fitondrana voafidim-bahoaka iny. Mazava loatra fa dia izy ireny no « notendren’ilay milaza fa natosiky ny tolom-bahoaka » ho eo amin’ny toeran’ireo izay notendren’ny vahoaka hisolotena azy.

Izay tokoa angamba no tonga amin’ilay fiteny mahazatra manao hoe : « tsy misy tandroka ny ratsy ».
Iaraha-mahalala anefa fa na teo aza izany ahiahy rehetra izany dia tsy nisy afa-niteny ny vahoaka satria tratran’ny “atody tsy miady amim-bato”. Ary dia tonga amin’izao zava-misy eto amin’ny firenena amin’izao fotoana izao isika: ady tombontsoa, ady seza, fifandirana, fifaminganana: santionany amin’ny zava-misy ao an’ivon’ny parlemanta, indrindra ny Filankevitra avon’ny tetezamita izao. Porofon’izany ny ady hevitra izay nanakatonam-baravarana nandritra ny roa andro nataon’izy ireo samy izy. Ary dia lasa lavitra mihintsy ny fifanolanana satria na dia ireo mpiara-mitolona fahiny teny amin’ny kianjan’ny 13 mai aza, sy ireo samy mpanohana ny filohan’ny tetezamita dia samy tsy mifampitsitsy amin’ny fifanankianana sy ny fifanonganana nohon’ny fitadiavana tombontsoa manokana amin’izao fotoana kely sisa mialoha ny fahataperan’ny tetezamuta izao. Mbola tsy fantatra rahateo ny rahampitso, na ho tafaverina na tsia ao amin’izany andrim-panjakana izany.
Tsy ny fahazoan’izy ireo tombontsoa no tena mampalehelo ny valala be mandry fa ny tsy firaharahana ny vahoaka Malagasy izay noterena hanana azy ireo ho solon-tena, satria tsy misy voafidim-bahoaka izy ireo na iray aza. Ny filohan’ny tetezamita no nifidy azy ireo. Mazava arak’izany dia izy no niantoka ny maha izy azy ireo olona ireo rehefa natolotra azy ny anarany. Hita mibaribary anefa fa tsy misy mendrika izany maha parlemantera azy izany ny an-kamaroan’izy ireo noho izy tsy mijery afa-tsy ny tombontsoany.
Ireto avy ny antony ilazan-tsika izany. Tsy asian’ireo mpikambana ao amin’ity andrim-panjakana ity resaka mafana toy izay natao nandritra ny andro roa izay teny amin’ny CST ny momba ny fasahiranam-bahoaka manoloana ny fiakaran’ny vidin-javatra sy ny fiakaran’ny vidin’ny solika ary ny fiakaran’ny saran-dalana. Tsy mba nasian-dry zareo fitakiana toy izay ataony amin’izao fotoana izao ny fitakiana nataon’ireo mpitsabo mpanampy sy ireo mpampianatra eny amin’ny sekolim-panjakana. Tsy asian-dry zareo resaka ny raharaha fandrobana izay miseholany amin’ny faritra maro eto amin’ny firenena. Tsy asian-dry zareo resaka ihany koa ny momba ny fanararaotam-pahefana miseho amin’ny endriny rehetra eto amin’ny firenena.
Santionany amin’ireo zava-misy mitambesatra amin’ny vahoaka ireo kanefa tsy asain’ireo mpikambana ao amin’ny CST sira akory fa ny tombontsoan’izy ireo ihany no mahamaika azy.
Aza adino anefa fa mitazana sy mitadidy ny vahoaka. Ho tsaroany izany rehetra izany rehefa ho avy hangataka ny vatony izy ireo. Ho tsaroany izany na dia hamafy vola mikararahana aza izy ireo mandritra ny fifidianana. Izay indrindra no ilazana fa famonoan-tena izao ataon’ny CST izao, satria tsy hisy ahatoky azy ireo intsony na ny vahoaka any amin’ny tany nihaviany aza noho izao fihetsika mitory famadihana azy ireo izao. Angamba hanao fanonganam-panjakana hafa indray vao mety ahita lalana hiverina an-dapa.