Tonga lafatra !

12/11/2012

Izy (ny ministry ny Serasera Harry Laurent Rahajason) no teknisiana mahay sy tonga lafatra indrindra eo amin’ity sehatry ny asa fanaovan-gazety ity. Izany no ren’ny sofina rehefa mihaino azy mikabary sy manao fanambarana amin’ny hainoamanjery. Tsy mba ny ministry ny Serasera velively no ndeha hanely vaovao tsy marina izany; marim-pototra ary nandalo ireo dingana rehetra takiana amin’izany avokoa ny vaovao nambran’ity minisitra ity sy izay nosoratany tamin’ireo gazetiny.

Marihana tokoa mantsy fa manana gazety ny minisitra Harry Laurent Rahajason ka ny filoha tale jeneramin’ny Sodiat, Mamy Ravatomanga no lehibeny. Mazava ho azy ary heverina fa “rariny loatra” raha tsy isan’ireo gazety nitatitra ny valan-dresaka nataon’ny tangalamena Zakariasy Patrick ohatra ny La Vérité sy ny Inona no Vaovao ary ireo izay manana fifandraisana akaiky amin’ny minisitra. Midika ve izany fa nanao fanadihadiana momba ireny antontan-taratasy sy ny voatoatin’ny fanambarana nataon’ny tangalemana ireo gazety ireo ka izany no antony tsy namoahan’izy ireo iny valan-dresaka nataon’i Zakariasy Patrick iny?Aleo tonga dia maka ohatra mivaingana hanazavana ny sain’ny mpamaky amin’ity fanenjehana mahazo ny gazety La Nation, Gazetiko ary Midi Madagasikara ity: impiry izay valan-dresaka an-gazety nataon’ny mpitandro filaminana izay ary nitatitra amin’ny antsipirihany izay zava-boalaza nandritra izany ny hainoamanjery. Ny raharaha mpiandry fonja angamba no akaiky indrindra. Nazava ny resaka nataon’ny CIRGN Antananarivo mikasika iny fanafihana ny Acces Banque iny; nahazo fahafahana avokoa anefa ireo mpiandry fonja, eny hatramin’ilay voalaza fa tratra tany amina jiolahy ny karatra maha mpiandry fonja azy. Tsy mitombona ve izany ny vaovao nampitain’ny CIRGN tamin’ny mpanao gazety matoa nahazo fahafahana ireo mpiandry fonja ireo?
Tsy sanatria milaza fa tonga lafatra akory ny hainoamanjery sy ny mpanao gazety na sanatria koa hilaza fa ambonin’ny lalàna fa mba misy ihany zavatra heverina fa mitanila ary miendrika fanohintohinana ny asa fanaovan-gazety mihitsy aza. Rehefa ny mpitondra tokoa ve izany no mampiantso mpanao gazety dia marina sy tonga lafatra avokoa ny zava-boalazany? Ka inona no antony mbola hilantsika ireo mpamatsy vola mahazatra kanefa nambaran’ny filoha Rajoelina ampahibemaso izao tany Toliara fa tsy mila ny fanampian’ireo mpamatsy vola mahazatra; nahoana no tsy natao ny fifidianana ben’ny tanàna sy solombavambahoaka izay efa nambara tamin’ny fomba ofisialy fa hatao ny 20 desambra 2010 ary efa niantsoana ny mpifidy? Nitatitra izany vaovao izany avokoa ny hainoamanjery izay tsy nitombona akory ary tsy ilàna fanadihadiana fa milaza miara-mahita isika rehetra.
Tonga lafatra rehefa ianareo ; feno tasy sy pentina kosa rehefa ny hafa! Mbola haverina eto indray ity fanamarihana iray ity: sahala amin’ny ahoana ny titre La Une nataon’ny ministry ny Serasera Harry Laurent Rahajason na Rolly Mercia, raha ohatra ka nitory mpanao gazety nitatitra vaovao avy tamina valan-dresaka an-gazety nataon’olona iray ny fitondrana Ravalomanana Marc fony mbola teo amin’ny fanjakana? Saingy ririnin-dasa tsy tsaroana toa ny fanovàna nampanantenaina ny vahoaka teny an-kianja ihany moa izy ity.