Valim-babena !

05/11/2012

Sahala amin’ny sosoa notampohan-drano avokoa ny mpitandro filaminana avy ao amin’ny Emmo raha nandre ny fanapahan-kevitra noraisin’ny Fampanoavana mikasika ireo mpiandry fonja am-polony voarohirohy tamin’ny fampandosirana gadra sy ny fanafihana ny Acces banque. Nahazo fahafahana vonjy maika avokoa izy rehetra taorian’ny fandalovany tetsy amin’ny lapan’ny Fitsarana Anosy. Toromarika avy tamin’ny ministry ny Fitsarana, Christine Razanamahasoa hono izany ka dia voatery manaraka baiko ny lehiben’ny Fampanoavana ambaratonga voalohany. Toa hoe tsy mahafaly ireo tomponandraikitra ambony ao anivon’ny Foloalindahy toa ny ministry ny Tafika ny jeneraly Rakotoarimasy Lucien, ny SEG ny jeneraly Randrianazary izany fihetsiky ny ministry ny Fitsarana izany, raha ny vaovao azo. Fa nahoana tokoa ?

Nahatadidy ny soa natao azy tokoa ny ministry ny Fitsarana, Christine Razanamahasoa ka voatery niditra an-tsehatra tamin’ity raharaha ity. Ny Mpiandry fonja tokoa mantsy no niaro azy teo amin’ny sezany, tamin’ny fotoana nitakian’ny fianakaviamben’ny Mpitsara ny fanesorana azy teo amin’izany andraikitra izany. Izay no antsoina hoe valim-babena. Tsy ny tombotsoam-bahoaka intsony no mibaiko ny fanapahan-kevitra. Fa inona tokoa no helok’ireo Mpiandry fonja ireo na atao aza hoe tena namoaka ireo gadra mpanao fanafihana mitam-piadiana ireo tokoa izy ireo?
Ny fanjakana HAT tarihin’ny filohany Andry Rajoelina izao ange no nitarika famoahana gadra voalohany teto amin’ny firenena ny taona 2009 e! Koa nahoana kosa no henjehina tahaka izao rehefa ny Mpiandry fonja nomamoaka gadra? Inona no porofo hilazan’i Pety na Voninahitsy, ohatra fotsiny, fa gadra politika izy ireo. Ny fanaovan’izy ireo politika na ny maha mpanao politika azy ireo angaha no vesatra nanenjehana sy nanamelohan’ny Fitsarana azy ireo tamin’ny anaran’ny vahoaka Malagasy? Ny ministry ny Fitsarana Christine Razanamahasoa no tomponandraikitra mivantana tamin’izany famoahana gadra am-polony tao Tsiafahy sy manerana ny fonja teto Madagasikara ny taona 2009 ka rariny loatra ny fanapahan-kevitra noraisiny nanome baiko ny Fampanoavana namotsotra ireo Mpiandry fonja ho valim-babena ho azy ireo.
Ny mpangalatra akoho sy mangahazo irery ihany no tsy mba manana izany zo mivoaka ny fonja izany. Tsy mba manana hatao valim-babena mantsy izy ireny ka dia mendrika azy ireo ny mijanona any am-ponja any. Mba mampihena isa ireo mahantra mirenireny an-dalambe manimba endrika ny tanàna koa e! Marina ary voaporofo tokoa izao fa ny soa atao levenam-bola. Tsy nanenenan’ireo Mpiandry fonja mihitsy ankehitriny ny fanohanan’izy ireo ny ministry ny Fitsarana, Christine Razanamahasoa tamin’ny sezany. Voaporofo ihany koa izao fa izay manana basy irery ihany no manan-jo hiteny sy hitaky izay tadiaviny amin’ity fitondrana tarihin’ny filoha Rajoelina ity. Aiza ery nefa ny fepetra noraisin’ny mpitondra manoloana ny Paramed, Sempama, Seces, sns.