Ela fidona

30/10/2012

Nahafantarana ny Malagasy ny hoe « moramora ». Toa mifototra amintsika anefa izany fisainana izany amin’izao fotoana izao noho ireto antony ireto. Herinandro mahery sahady izay no lasa taorian’ny fahatongavan’ireo delegasiona matevina miisa roa be izao avy amin’ny SADC, izay voalaza fa hijery ny fivoaran’ny fampiharana ny tondrozotra eto Madagasikara. Na dia nanakoako teto amin’ny firenena aza ny fahatongavan’izy ireo sy ny fihaonany tamin’ireo izay noheveriny fa voakasika amin’ny famahana ny krizy teto amin’ny firenena, dia toa tsy mifanentana amin’izany intsony amin’izao fotoana izao ny tohin’ny raharaha.

Raha ireny fihaonana natao tao anatin’ny andro vitsy ireny tokoa no jerena dia toa maika dia maika ny hitondra vahaolana ho an’i Madagasikara tokoa ireny olona ireny. Herinandro mahery anefa izay no lasa, tsy re intsony hatreto na mbola misy antenaina na tsia ny amin’ny vahaolana avy amin’izy ireo.
Torak’izany koa ny FFKM izay angamba efa an-jatony izao no nantsoina mba handray ny andraikiny eo amin’ny fampihaonana indray ireo mpifanandrina nahatonga izao krizy izao mba ahafahana mikatsaka vahaolana samy malagasy ivoahana amin’ny fasahiranana manjo ny isan-tokonambaravarana. Toy ny toriteny eny an’efitra anefa izany antso atao amin’ny FFKM izany hatramin’izao satria toa lany fotoana amin’ny fikenonkenonana sy ny fiomankomanana lava izao izy ireo hatramin’izao.
Raha ireo rehetra ireo no jerena dia tsapa samy toa tsy misy te-handroso haingana amin’ny famahana ny krizy na ny mpanelanelana avy amin’ny fianankaviambe iraisam-pirenena na ny avy eto amintsika. Ny krizy anefa ity mamely dia mamely, ary tsy hoe mih- mora fa miha sarotra hatrany, raha tsy hilaza afa-tsy ny fiakatry ny vidim-piainana izay mila ho isan’nandro vaky izao isika. Betsaka ny mahita fa tsy fantatra intsony ny hanjo ny Malagasy ao anatin’izao fahavaratra izay miandoha izao. Fotoam-pahavaratra izay mahasahirana ny isan-tokatrano eto Madagasikara. Hanao ahoana ihany koa ny mba ho fiatrehana ny faran’ny taona ho an’ny fianankaviana isan’isany avy. Tsy resahana intsony ny firongatry ny tsy fandriam-pahalemana sy ny fahalovana ary ny fanararaotana amin’ny endriny samihafa eto amin’ny firenena izay mampiraviravy tanana ny be sy ny maro amin’izao fotoana izao. Manampy trotraka izany ny tsy fisian’ny fifampitokisanaa intsony eo amin’ny samy mpitondra amin’izao tetezamita izao izay miseho amin’ny alalan’ny fifaminganan’ireo izay samy nanohana ny fametrahana ny fanjakana tarihan-dRajoelina. Porofon’izany ny fanonganana ny filohan’ny Filankevitra avon’ny Tetezamita izay nahitana taratra fa ttsy mifampatoky intsony ireo samy mpanohana ny filoha Rajoelina. Mandeha ihany koa amin’izao fotoana izao ny resaka moba ny fikasan’izy ireo ny hangataka ny fametram-pialan’ny minisitry ny Vola ao amin’ny Governemantan’ny firaisam-pirenena. An-kilan’izany rehetra izany dia tsy hita taratra hatramin’izao izay tena fandraisan’andraikitry ny Praiminisitra lehiben’ny governemanta izay napetraky ny tondrozotra mba hitondra an’i Madagasikara hiala amin’izao fasahiranana izao.
Mampanahy mafy arak’izany ny zava-misy eto Madagasikara. Mampanahy mafy satria matoa tsy rototra amin’ny famahana ny olana ny isan’isany avy, indrindra ireo izay antenaina hamaha ny olana, dia mety misy tanjona tian-katao any ho any. Tanjona izay tsy fantatra mazava tsara na hitondra tombontsoa ho an’ny vahoaka na tsia.