Fahadisoan’i Beriziky ?

06/11/2012

Nanelingelina mafy ireo tia seza sy fahefana ary vola mihitsy ny fanambarana nataon’ny praiminisitra Omer Beriziky izay nilaza fa tsy tokony hilatsaka ho isan’ny kandidà ny filoha teo aloha Ravalomanana Marc, Zafy Albert, Ratsiraka Didier ary ny filoha Rajoelina sy ny tenany (praiminisitra) izay tsy nanana eritreritra hilatsaka rahateo koa teo anatrehan’ny andraikitra nankinina taminy. Avy hatrany dia nitabataba ireo hainoamanjery mpomba ny fitondrana ka nanambara fa ny praiminisitra Omer Beriziky no misakana ny filatsahan-kofidian’ny filoha Andry Rajoelina. Ririnin-dasa tsy tsaroana tokoa angamba ny azy ireo. Ny filoha Rajoelina izao no nilaza ho ren-tany sy ren-danitra fa tsy hilatsaka hofidiana ny tenany. Koa inona no tsiny sy hadisoana nataon’ny praiminisitra Omer Beriziky nampahatsiahy tamin-dRajoelina ny teny nataony tamin’ny vahoaka? Tsy hisy fifidianana madio sy mangaraharaha izany rahateo koa raha vao milatsaka hofidiana ny filoha Rajeolina. Izao sahady aza ny tenany ary ireo mpiara-dia aminy dia efa mandika lalàna manao fampielezan-kevitra mialohan’ny fotoana, mampiasa ny fitaovana sy ny volam-panjakana ho amin’izany.

Ny fisintahan’ireo filoha teo aloha sy ny filoha Andry Rajoelina tsy handray anjara amin’ny fifidianana izay ho filoham-pirenena Repoblika faha-IV irery ihany no vahaolana hialana amin’izao krizy izao; fitiavan-tena sy fanaovana sorona ny mpiray tanindrazana ny mifanohitra amin’izany. Deraina etoana ny fijoroan’ny praiminisitra Omer Beriziky nahsahy nilaza ny lalana marina hivoahana amin’izao krizy izao. Saingy miliara sy voninahitry ny sasany moa no voatohintohina amin’izany fanambarana nataony izany koa tsy mahagaga raha nihazakazaka nampiasa ireo hainoamanjery mpiara-dia aminy ry zareo ao Ambohitsorohitra ao.
Ny fanirian’Ambohitsorohitra dia ny hoe: Andry Rajoelina no filoham-pirenena Repoblika faha-IV, André Resampa no sekretera jeneraly, Patrick Leloup no ministry ny Vola, Mamy Ravatomanga no praiminisitra,… Ny hifikitra eo amin’ny sezany no mahamaika ny mpitondra ankehitriny fa tsy ny fivoahana amin’izao krizy mamono ny firenena sy ny mpiray tanindrazana izao. Rariny sy hitsiny mihitsy ny fanambarana nataon’ny praiminisitra Omer Beriziky raha nilaza izay heveriny ho amin’ny firenena, ho famaranana haingana izao loza manjo ny Malagasy 20 tapitrisa izao.
Ny pôlisy manafika fonja sy Fitsarana ary mamono mpitsara, ny mpiandry fonja mandrahona hikomy raha vao tazonina am-ponja ireo namany voarohirohy amin’ny famohana gadra sy fanafihana banky, ny miaramila mikomy tsy nety handoa hetra amin’ny karamany, sns. Inona ihany no mbola hifikiran’ny filoha Rajoelina sy ny forongony eo amin’ny fitondrana kanefa hita izao fa tany tsy misy fanjakana intsony eto. Raha resaka fandatsahan-drà indray no hiadian-kevitra, iza no sahy milaza fa tsy feno rà ny tanany? Aza adinoina fa mbola miandry ny filoha Rajoelina ny raharaha 26 janoary 2009 ary tsy ho reraka hibatabataba sy hampahatsiahy izany ny olom-pirenena.