Famonoana !

03/11/2012

Nisokatra avokoa ireo tranombarotra sy tsena ary nanohy ny asa fitadiavany andavanandro ny ankamaroan’ny olona afatsy ny mpiasam-panjakana. Lany nandritra ny filan-kevitry ny Minisitra farany teo tokoa mantsy fa natao andro tsy fiasana kanefa handraisan-karama ny zoma 2 novambra 2012. Vitsy anefa ireo nanaraka sy nampihatra izany fanapahan-kevitry ny fitondram-panjakana izany noho ny antony maro samy hafa.

Mazava ny tetiky ny fitondram-panjakana nanadray iny fanapahan-kevitra iny dia ny mba hanapahana ny fitohizan’ny hetsiky ny mpianatra eny Ankatso ; famonoana afo raha ny marina kokoa. Efatra andro be izao nanomboka ny alakamisy lasa teo mantsy ny andro tsy niasana ; zava-dehibe amina hetsika iray tokoa anefa izay fiatoana izay satria dia hiverina « hanafana » ilay hetsika indray izany ireo mpitarika azy. Paika iray nentin’ny mpitondra fanjakana hamonoana ny hetsiky ny mpianatra eny amin’ny oniversite iny fanapahan-kevitra namaritra ny andro zoma ho tsy fiasana kanefa handraisan-karama iny. Mazava ho azy fa ireo mpiasam-panjakana no tsy namonjy ny toeram-piasany fa ireo atidoha mikotrikotrika ao Ambohitsorohitra kosa nanao izay tratry ny heriny, « handaminana » ny grevin’ny mpianatra eny Ankatso ; tsy inona izany fa ny fanambazana ireo mpitarika mety ho sodokan-dRavola. Izay hampitonitony sy hampangingiana ny rivotra iainana eto an-drenivohitra fotsiny no maha maika ny mpitondra fa tsy mijery ary tsy miasa saina amin’izay mety ho voka-dratsin’ny fanapahan-kevitra noraisiny.
Famonoana ny sehatra tsy miankina mantsy iny fanapahan-kevitry ny mpitondra fanjakana iny; mavesatra ho an’ireo orinasa madinika sy salan-tsalany ary ny sehatra tsy miankina amin’ny ankapobeny. Mitombo mantsy ny vesatra zakain’ny orinasa amin’ny fandoavana ny karaman’ny mpiasa kanefa tsy mamokatra. Efa marary toa ny rehetra noho izao krizy izao ny sehatra tsy miankina, mba tsy hilazana fa mizaka ny tsy eran’ny ainy mihitsy nanomboka ny faha-26 janoary 2009. Soa ihany fa mahatsapa izany olana goavana sedrain’ny orinasa mampiasa azy izany ny ankamaroan’ny mpiasa tsy miankina ka nanaiky ny hamonjy toeram-piasana na dia andro tsy fiasana aza omaly. Mazava ho azy fa tsy mba afaka ny higoka izany fitsaharana izany velively ireo miasa tena. Tsy natao mahagaga araka izany raha feno olona ary nitohana toa ny andavanandro ny fifamoivoizana an-dalambe. Naleon’ny olona nivoaka ny trano namonjy an-dRafitadiavana; tsy manam-bola nialàna sasatra rahateo koa.
Famonoana afo ny hetsi-panoherana nataon’ny mpianatra teny amin’ny oniversite no nibaiko ny fitondram-panjakana nanokana ny andro zoma ho tsy fiasana kanefa handraisan-karama; fanohizana ny famonoana ny sehatra tsy miankina efa nataon’ny mpitondra hatramin’ny taona 2009 koa anefa izany. Ireo izay akaiky sy mahita mamy amin’izao fitondrana Tetezamita izao irery ihany no nibitaka sy nifaly tamin’izany fanapahan-kevitra izany satria izy ireo no manana ambim-bava sy tahiry; ny vahoaka kosa ny hohaniny androany aza mety tsy mbola ho hitany rahampitso. Raha tsorina ny resaka dia famonoana ny firenena hatrany ny fanapahan-kevitra raisin’ity fitondram-panjakana ity.