Lafatra ity filoha ity!

22/10/2012

Tsy mbola nisy toa ny filoha Andry Rajoelina raha mbola samy filoha nifandimby teto Madagasikara. Sady tanora, tia tanindrazana, mandala ny fahalalahana sy ny demôkrasia, tsy tia aferafera, manam-pahaizana, tsy mitanila, tsy manavakavaka foko na fihodirana, misokatra amin’ny fifanakalozan-kevitra sy ny mangarahara, sns.

Taiza no mbola nisy mpitondra tia tanindrazana mihoatra noho ny filoha Rajoelina; vao telo taona monja no nitondrany ny firenena dia izao tafakatra avo be izao ny harin-karena, eo am-pototry ny masoandro mibaliaka ny Air Madagascar sy ny Jirama, manana ny asa fivelomana sahaza azy avokoa ny olom-pirenena, mandry fehizay ny tanàna, sns. Lafatra loatra ity filoha ity, hita soritra eny amin’ny fihetsiny mihitsy ilay fitiavan-tanindrazana tsy manam-paharoa. Izany izy rehefa manolotra fanomezana isam-bolana ho an’ny Foloalindahy izany; lafatra, tena lafatra e!
Nandritra ny fitondran’ny filoha Rajoelina no tena nahatsapana izany fahalalahana sy demôkrasia izany. Feno olona hatrany ny kianjan’ny demôkrasia etsy Ambohijatovo isaka ny faran’ny herinandro; mahazo miteny izay tiany ny AV7 (discours de Talion), mahazo midina an-dalambe ary misokatra midanadana ho an’ny mpanohitra ny varavaran’ny RNM sy ny TVM. Tadidio fa taratry ny fahalalahana ireny dokambarotra ataon’ireo orinasa mpivarotra zava-pisotro mahamamo toa ny Skol, THB, Castel, Gold, Libertalia, sns. Lafatra loatra ity filoha ity !
Nandritra ity fitondran’ny filoha Rajoelina ity no mangaraharaha indrindra teo amin’ny fitantanam-bolam-panjakana ary tsy misalasala mihitsy manolotra fanomezana: sefom-pokontany, miaramila, mpanao rugby. Tsy niandry ela akory ireo Sempama sy Paramed ary Seces fa avy hatrany dia novahan’ny filoha ny olan’izy ireo, nividianany 4x4 maro be ny Emmo, hahazo hélico sy kamio be tsy ho ela ny Foloalindahy, voky hatreny an-tendakeliny noho ny Vary Mora sy ny Tsena Mora ny vahoaka. Firy ora alohan’ny hivoahany any ivelany dia efa mahafantatra izany avokoa, amin’ny alalan’ny Seraseran’ny prezidansa ny vahoaka 20 tapitrisa. Lafatra loatra ny filoha Rajoelina !
Hatry ny oviana no mbola nisy fitondrana nanjakan’ny firaisam-pirenena noho izao fitondran’ny filoha Rajoelina izao ? Taratry izany firaisam-pirenena izany ireo filohana andrim-panjakana maro toa ny praiminisitra, filohan’ny CST sy ny CT, ny HCC, ny prezidansa mazava ho azy. Hafa ny tamin’ny andron’ny filoha teo aloha Marc Ravalomanana izay Merina avokoa no notendreny tamin’izany andraikitra izany. Lafatra loatra !
Koa aza misalasala ry vahoaka ; fidio avy hatrany izy raha vao milatsaka ho kandidà. Lafatra, tena lafatra ity filoha ity !