Ho an’ny Tanindrazana!

19/10/2012

Adihevitra tsy misy farany ity fodian’ny filoha teo aloha Marc Ravalomanana ity. Telo taona mahery izao no nanambaran’ny Magro sy ny ankolafy Ravalomanana izany fodiany an-tanindrazana izany; nanambara mihitsy aza ny filohan’ny Kongresin’ny Tetezamita, Mamy Rakotoarivelo, fa tsy maintsy tafaverina ny faha-18 oktobra lasa teo ny tenany, saingy…

Isan’ny anton-dian’ireo SADC sy ny miaramila ao aminy eto an-tanindrazana ity resaka fodian’ny filoha teo aloha ity ka nahatonga ireo fihaonana sy fivoriana maro samy hafa teo amin’ny mpanao politika sy ny Foloalindahy. Mazava ny fanapahan-kevitry ny Tafika mikasika ity adihevitra ity: tsy mbola mety ny fodian’ny filoha teo aloha Marc Ravalomanana satria mety hiteraka korontana.
Ho an’ny Tanindrazana ve izany fanapahan-kevitry ny Foloalindahy izany? Io no fanontaniana mipetraka manoloana izao fanapahan-kevitry ny Tafika izao. Samy manana ny fomba handikany sy hijereny azy avy ny tsirairay. Mazava ho azy fa mety tokoa izany fanapahan-kevitra izany ho an’ny mpitondra fanjakana sy ny mpiara-dia aminy; fitanilàn’ireo manamboninahitra sy tomponandraikitra eo anivon’ny Foloalindahy kosa ho an’ny mpanohitra ary ireo mpomba an-dRavalomanana Marc. Mba nanontaniana ny heviny kosa ve ny vahoaka Malagasy 20 tapitrisa leon’izao krizy lava tsy misy farany izao? Tsy misy afaka miteny amin’ny alalan’ny Tanindrazana ankoatra ny vahoaka tompon’ny fahefana mantsy ary araka izany teny hoe vahoaka izany dia mazava ho azy fa tsy ny AV7 fotsiny ihany fa ny rehetra: mpisan’ny orinasa afaka haba, ireo tompona tranombarotra voaroba nandritra ny 26 janoary 2009, ny mpiasam-panjakana, ny tsy an’asa, ny tantsaha, sns.
Ho an’ny Tanindrazana koa ve aloha ny fihizingizinan’ireo mpanao politika toa an-dry Ranaivo Raholdina izay mitsipaka mafy ny fodian’ny filoha teo aloha? Tenin’ny vahoaka ve no entin’itony mpanao poltika sasan-tsasany itony ary nahazo fahefana tamin’ny vahoaka hisolotena azy ve izy ireo? Aorian’ny fifidianana, izay lanim-bahoaka irery ihany no manana izany fahefana izany fa tsy mpanao politika tsy hisy mpifidy na filoham-pokontany toa ny sasany velively. Tokony hahay hitsara ten any mpanao politika, indrindra ireo mambra ao anivon’ny CT sy ny CST fa tsy voafidim-bahoaka akory izy ireo; izay nanendry azy ireo teo amin’izany toerana izany ihany no mihevitra azy ireo ho manam-pahefana.
Matahotra ny hisian’ny korontana noho ny fiverenan’ny filoha teo aloha ny Tafika. Rahoviana moa ny Foloalindahy no nahavita niaro ny vahoaka sy ny fananany? Rariny loatra raha mitsotra ny marina ny Foloalindahy satria fantatr’izy ireo tsara fa tsy manana ny fahaiza-manao amin’izany ny Tafika Malagasy. Fantatr’ireo tomponandraikitra eo anivon’ny Foloalindahy ireo fa tsy izao Tafika tia vola sy mivavaka amin’ny vola izao mihitsy no afaka hiantoka ny filaminana eto amin’ny tany sy fanjakana rahatoa ka misy izany fiverenan-dRavalomanana Marc izany.