Fanjakana mihosin-drà !

25/10/2012

Tamin’ny alalan’ny fandatsahan-drà no niakaran’ny filoha Rajoelina teo amin’ny fitondrana ary mbola fandatsahan-drà ihany koa no nifehezany izany fitondrana izany. Ity Tetezamita ity no fanjakana nihosin-drà indrindra teto amin’ny tantaran’ny firenena. Ny rà latsaka nandritra ny Alatsinainy Mainty ny faha-26 janoary 2009 sy ny 7 febroary 2009 teny Ambohitsorohitra no vy nahazoan’ny filoha Andry Rajoelina izao fanjakany izao. Nanomboka teo dia tsy nitsahatra izany fandatsahan-drà izany ary niha loza hatrany aza ny zava-misy.

Mandriaka ny rà any Atsimo, saika isan’andro ny fandatsahan-drà any an-toerana: am-polony, an-jatony isaka ny mihetsika ny razana. Ny filoha Rajoelina mihitsy anefa no nandefa ireo Tafika handripaka ny mpiray tanindrazana ary fanapahan-keviny izy samy irery izany fa tsy mba nentina teo anatrehan’ireo parlemanta na ny governemanta. Tsy nihonona intsony tamin’ny fanampenam-bava ny endriky ny jadon’ny filoha Rajoelina. Izay fandraisana fanapahan-kevitra samy irery izay no endrika farantampony amin’ny jadona; izay no antsoina hoe didy jadona ary tsy maintsy mihafara amin’ny fandatsahan-drà.
Nosongonan’ny filoha Rajoelina avokoa ireo mpitondra nandatsa-drà teto amin’ny firenena. Ny amiraly Didier Ratsiraka no noheverina fa nitàna ny laharana voalohany teo amin’izany fandatsahan-drà izany noho ny raharaha Kung fu sy ny 10 aogositra 1991. Kinanjo, tao anatin’ny telo taona monja dia voasongon’ny filoha Rajoelina izany. Ezaka kely fotsiny sisa dia hihoatra ny arivo ny olona maty novonoina nandritra ity Tetezamita ity, raha atontaly ny isan’ny maty nandritra ny raharaha 26 janoary sy 7 febroary ary ny vonoana olona any Atsimo.
Mihosin-drà ny fitondrana Rajoelina. Tomponandraikitra feno amin’izany ny tenany; izy irery rahateo koa no naka ny fanapahan-kevitra raha tsy hiresaka afatsy ny any Atsimo. Tapitra ripaka ny tanora any amin’ny Faritra Androy sy Anosy noho ireo fitaovam-piadiana mahery vaika fampiasa amin’ny tany miady nalefan’ny filoha Rajoelina. Dia izany fitondrana mihosin-drà izany no mihevitra hikarakara fifidianana madio (??). Hanakom-pery rahoviana moa io fandripahana olona any Atsimo io? Misaina izany ve ireto mpitondra ireto sa dia faly miaro ny sezany fotsiny ihany?
“Fanjakana loham-boto tsy ho ela velona”, hoy Bekoto. Ny fanjakana mihosin-drà kosa tsy havelan’ny hasin’ny rà latsaka hanana filaminana sy fiadanana mandrakizay. Nitaky fanovàna ny vahoaka; fanjakana mihosin-drà tahaka izay efa naloany ihany anefa no mbola mitondra azy ankehitriny. Tadidin’ny filoha Rajoelina ve ny kabariny nanao hoe: “aoka izay ny rà latsaka!”, sa an-tendro-molotra nentina nanamelohina ny hafa fotsiny ihany izany? Tsy afaka ny handà intsony ny filoha Rajoelina fa miorina ambony rà ny fanjakany. Nandatsa-drà ny amiraly Ratsiraka sy Ravalomanana niarovany ny fitondrany; nomelohin’ny vahoaka noho izany izy ireo. Fa mbola izay fandatsahan-drà izay koa no niarovan’ny filoha Rajoelina ny fitondrany nandritra izay telo taona izay ka tsy tokony hanenjika olona intsony ny tenany.