Iraikalahy taloha !

18/12/2012

Ohatra ny manonofy sisa mahatsiaro ny hatsaran’ny lalana mampitohy ny renivohitra amin’ny kaominin’Itaosy tamin’ny andron’ny filoha teo aloha Marc Ravalomanana. Tsy nisy orinasa na foiben’ny Tiko na Magro akory tany amin’iny faritr’Itaosy kanefa dia nahazo ny anjara masoandrony. Tsy fihinana mantsy ny lalana, izany no nankalazaina nandritra ny fitondrana teo aloha izay nifantoka tamin’ny fanokafan-dalana vaovao (marais massay, boulevard de l’Europe, By-pass, sns) ary ny fanamboarana ireo efa nisy.

Ankehitriny kianja fanaovana rugby, kianjan’Antsonjombe no hitan’ny mpitondra ho laharam-pahamehana. Ny azy ireo mantsy 4x4 no fitondrany ; an’ny Fanjakana rahateo ka tsy dia misy olana na ho potika rahampitso aza. Velon-taraina kosa ireo mpitatitra, olon-tsotra noho ny haratsin’ny lalana eny Itaosy; miantraika amin’ny fiara ny fahavoazana haterak’ireo lavaka.
Toraka izany koa ny lalana etsy Andohatapenaka mihazo an’ny Vatobe sy 67 Ha. Milatsaka in-droa na in-telo fotsiny sisa ny rotsak’orana dia izay no izy. Dia voatery hiandry an-dRavalomanana Marc ve izany vao ho vita ireny lalana ireny; ho afaka ny adin-tsain’ny tompona fiarakodia? Kianja filalaovana kanetibe indray mantsy no laharam-pahamehan’ny fitondrana manaraka eo. Fa angaha moa azo hanina koa ireny kianja ireny e? Toa azo hanina ihany mantsy ny lalana rehefa tena dinihina: malalaka ny fivezivezena, misokatra ny fifanakalozana, sns. Ny karana irery ihany no mahita toimbotsoa amin’izao fahasimban’ny lalana eto amintsika izao; izy ireo mantsy no mitàna ny ampahany maro amin’ny fivarotana piesy sy kojakoja momba ny fiarakodia.
Endri-javatra tahaka izao ange no mahatonga ny Malagasy hanenina hatrany e! Nitomany an’iraikalahy taloha tamin’ny fitondran-dRavalomanana noho ireo teritery sy ampihimamba teo amin’ny asa fandraharahana; izao indray koa mitomany an’iraikalahy taloha noho ny jadona sy ny tsy fisian’ny mangaraharaha amin’ny fitantanana ny volam-bahoaka, ny fahantrana, ny tsy fisian’asa ary indrindra ny fahapotehan’ny lalana, indrindra ny any amin’ny Faritany ary ireo faritra maro any ambanivohitra any.