Tohanam-potsiny !

27/12/2012

Jeneraly miisa 13 indray no nakarin’ny filoha Rajoelina ho « général de division » amin’izao fotoanan’ny krizy izao ; kolonely miisa 18 kosa no nakarina ho « général de brigade ». Hamelona jeneraly vaovao miisa 31 indray izany ny mpandoa hetra. Tohanam-potsiny ny fahasoavana ao anivon’ny Foloalindahy ao nandritra ity fitondran-dRajoelina ity. Grady, seza, vola ary tombotsoa maro isan-karazany. Voahitsaka an-tampon-doha mihitsy ny mpiasam-panjakana toa ny Sempama, Paramed, mpiandry fonja, Seces, ny injeniera, sns. Lakrimôzena sy fanapahana karama indray aza no setrin’ny fitakiana. Tiana ho tafita ny zanakao ? Araho ny torohevitra…

Aza dia mandany vola mandefa ny ankizy an-tsekoly firy intsony ; efa mazava ny lalana : ataovy izay hidirany ao anatin’ny Foloalindahy fa hotohanam-potsiny ny fahasoavany; raha tsy izany indray hampidiro ho isan’ireo mpilalao lavalava (rugby) ao amin’ny Maki fa azo antoka ny karama isam-bolana. Ny sandry sy ny basy ihany no miteny eto; ireo izay manana ireo fepetra roa ireo no afaka mivelona sy hahita ny anjara masoandroany amin’izao fitondran-dRajoelina izao. Avelao any izany université privée sy Ankatso izany fa tsy hitondra soa mihoatra iretsy roa ambony iretsy.
Hoy indrindra ilay ray aman-dreny iray izay : « les conscients ne sont pas armés et les armés ne sont pas conscients ». Izay no olana eto amin’ity firenena ity. Mba nitondra inona ho an’i Madagasikara sy ny vahoakany moa ny Tafika sy ny Foloalindahy hatramin’izay nisiany izay ? Remenabila aza tsy voasambotra hatramin’izao kanefa jeneraly sy kolonely firin-jato isa no velomin’ny mpandoa hetra ! Amin’izay indray mbola mitaky ny tsy handoa hetra amin’ny karamany indray izy ireo kanefa tohanam-potsiny mihitsy ny fahasoavana azon’izy ireo nandritra ity fitondran-dRajoelina ity.
Hibaby izay handimby ity fitondran-dRajoelina ity: nopotehina ny fiaraha-monina sy ny toe-tsain’ny vahoaka, nomena vahana ny tsy fanajana fitsipi-pifehezana sy ny ambaratonga, nomena izao tombotsoa rehetra izao ry zareo tompon’ny basy aman-tafondro. Tsy hita intsony izay hambara fa izao mitazana ny fitobaham-pahasoavana tohanam-potsiny ao anivon’ny Tafika sy ny Foloalindahy izao e !