Tandroka aron’ny rambony !

28/12/2012

Ririnin-dasa tsy tsaroana tokoa angaha ny an’ny Foloalindahy ka izany no nahatonga ireo tomponandraikitra ambony avy ao amin’ny Tafika nangataka ny tanan’ny vahoaka Malagasy, mba hanohanana ireo miaramila indrindra ny ara-moraly. Koa rehefa ny tandroka aron’ny vozona no tsy manana moraly hiatrehana ny olana sy ny hotohoton’ny krizy, sahala amin’ny ahoana izany ny vahoaka? Fa angaha tsy mahavita miaro tena indray ny miaramila ; tsy maharo azy ireo angaha ny basy ny lakrimôzena koa inona indray no ilàna ny fanohanan’ny vahoaka ? Tsy tandroka aron’ny vozona intsony ange izany ny Foloalindahy fa tandroka aron’ny rambony tsy ho tapaka e !

Tsy mahay maka lesona mihitsy ny mpitondra nifandimby teto hatramin’izay; mihevi-tena ho mafy be sy hitoetra mandrakizay eo amin’ny sezany avokoa. Mafy be daholo izany FRS, GMP, TTS, RESEP, REGAP sy GP izany saingy tsy nahita ny lavaka nanitrihana ny lohany avokoa rehefa nitodi-damosina ny vahoakan’Antananarivo. Sahala amin’ny ahoana ny nanjo ireo Emmo.nat tetsy amin’ny kianjan’ny 13 may ny faha-7 janoary 2002? Vavolombelon’izany angamba ny talen’ny kabinetran’ny pôlisim-pirenena, ny jeneraly Emmanuel Razafindrazaka. Vaky nandositra sahala amin’ireny voalavo nenjehan’ny saka ireny avokoa ireo mpitandro filaminana, eny hatramin’ireo manao saron-tava mpanapoaka “grenade assourdissante” tamin’ny vahoaka.
Izao ilay tonga amin’ny fitenenana hoe : taitra irery vao mamaky takotra ! Amin’ny fomba ahoana no hiverenan’ny fitokisan’ny vahoaka amin’ny Foloalindahy ao anatin’ny adim-pamataranandro kanefa ny fanendrena grady ho jeneraly miraraka sahala amin’ny fasika ? Ny vahoaka tsy mahita iray lovia isan’andro indray ve no tokony hanohana ara-moraly ny Foloalindahy voky hatrany an-tendankeliny amin’izao fitondran-dRajoelina izao ? Ndrao dia fandatsàna vahoaka kosa àry ireny fanaùbarana nataon’ireo tomponandraikitra ambony eo anivon’ny Tafika ireny ! Tandroka aron’ny rambony tokoa angaha sisa ny Foloalindahy Malagasy.